Somnath Suryavanshi: सोमनाथ सुर्यवंशी मृत्यूप्रकरणी अखेर FIR दाखल; कोणाचा समावेश? नेमकं काय म्हटलंय?

Somnath Suryavanshi Death Case: परभणी इथं सोमनाथ सुर्यवंशी कस्टोडियन डेथ प्रकरणी अखेर पोलिसांवर एफआयआर दाखल झाली आहे. सुप्रीम कोर्टाच्या आदेशानंतर परभणी पोलिसांनी मोंढा पोलीस ठाण्यात हा एफआयआर दाखल केला आहे. याप्रकरणावरुन राज्यात बराच गदारोळ झाला होता. पण काही काळ लढा दिल्यानंतर त्याला अखेर यश आलं आहे.

एफआयआर नेमकं काय म्हटलंय?

सोमनाथच्या आई विजयाबाई व्यंकटी सुर्यवंशी यांनी आपल्या मुलाच्या मृत्यूप्रकरणी न्यायालयीन लढा दिला. यामध्ये वंचित बहुजन आघाडीचे संयोजक प्रकाश आंबेडकर यांनी त्यांचा लढा हायकोर्टात आणि पुढे सुप्रीम कोर्टात लढला. ३० जुलै २०२५ रोजी सुप्रीम कोर्टानं या खटल्यासंदर्भात मुंबई हायकोर्टाचा निकाल कायम ठेवला. हायकोर्टानं सोमनाथचा मृत्यू न्यायालयीन कोठडीत झाल्यानं तसंच पोस्टमार्टम रिपोर्टमध्ये त्याच्या शरिरावर जखमा असल्याच्या पुराव्यांच्या आधारे तुरुंगात पोलिसांच्या बेदम मारहाणीतच त्याचा मृत्यू झाल्यावर निक्कामोर्तब केलं होतं. तसंच पोलिसांवर गुन्हा दाखल करण्याचे आदेश दिले होते.

दरम्यान, आज दाखल झालेला एफआयआर हा सोमनाथच्या आई विजयाबाई सुर्यवंशी यांच्या तक्रारीवरुन दाखल करण्यात आला आहे. परभणीतील मोंढा पोलीस ठाण्यात हा गुन्हा दाखल करण्यात आला आहे. याच्या तक्रारीत म्हटलं की, १५ डिसेंबर २०२४ रोजी परभणी पोलिसांकडून मला सकाळी ९ वाजण्याच्या सुमारास फोन आला की, तुमचा मुलगा सोमनाथ हा हार्टअटॅकनं मरण पावला आहे. त्याचं पार्थिव तुम्ही परभणीला येऊन घेऊन जावं. त्यानुसार आम्ही लातुरच्या निलंगा तालुक्यातील रामलिंग मुदगड गावातून परभणीतील सरकारी दवाखाण्यात जाण्यासाठी निघालो. पण परभणीजवळ आल्यानंतर रात्री साडे ९ वाजण्याच्या सुमारास मला सांगण्यात आलं की सोमनाथचा मृतदेह औरंगाबादच्या घाटी रुग्णालयात पोस्टमार्टमसाठी नेला आहे. त्यानंतर आम्ही तिकडे जाण्यासाठी निघालो पण परभणीतच आम्हाला पोलिसांनी अडवून पोलीस अधीक्षक कार्यालयात आणण्यात आलं आणि तिथले पोलीस अधिकारी घोरबांड यांनी मला सांगितलं की, आम्ही तुमच्या मुलाला मारलेलं नाही, तो हार्टअॅटॅकनं वारला आहे. आम्ही तुम्हाला मदत करतो, तुमच्या दुसऱ्या मुलाला पोलीस प्रशिक्षण देतो तुम्ही सोमनाथचा मृतदेह गावी घेऊन जा.

पण आम्ही पोलिसांचं न ऐकता औरंगाबादला जायला निघालो. तिथं गेल्यावर तिथं हजर असलेल्या कार्यकर्त्यांनी मला सांगितलं की, पोस्ट मार्टम रिपोर्टमध्ये पोलिसांनी मारहाण केल्यामुळं त्याचा मृत्यू झाला आहे. म्हणजेच माझ्या मुलाला मोंढा पोलीस स्टेशनच्या लॉकअपमध्ये तीन दिवस बेदम मारहाण करण्यात आली त्यामुळं त्याचं निधन झालं. त्यामुळं मोंढा पोलीस स्टेशनमधील अधिकारी आणि कर्मचारीच त्याच्या मृत्यूला कारणीभूत आहेत. त्यामुळं त्यांच्यावर गुन्हा नोंद करुन योग्य ती कार्यवाही करावी.

कोणावर नोंदवला गुन्हा?

दरम्यान, सुप्रीम कोर्टाच्या आदेशानुसार, ज्या पोलीस कोठडीत सोमनाथला मारहाण झाली, ज्या पोलिसांनी त्याला मारहाण केली त्यांच्यावर गुन्हा दाखल व्हावा. पण मोंढा पोलिसांनी दाखल केलेल्या एफआयआरनुसार, एकाच अनोळखी व्यक्तीवर गुन्हा दाखल केला आहे. यानंतर आता याप्रकरणी चौकशी समिती नेमण्यात येईल त्यानंतर याच्या चौकशीला सुरुवात होणार आहे. या चौकशीत पुढे नेमक्या कुठल्या पोलिस अधिकाऱ्यांनी किंवा कर्मचाऱ्यांनी त्याला मारहाण केली त्यांची नाव समोर येऊ शकतात.