NCP leader kidnapping : राष्ट्रवादीच्या बड्या नेत्याला भररस्त्यातून उचललं ; अपहरण करून बेदम मारहाण; थरार 'सीसीटीव्हीत' कैद

NCP leader attack news today : राज्यात गेल्या काही दिवसांपासून गुन्हेगारी घटनांची संख्या वाढताना दिसत आहे. या प्रकारांमुळे सर्वसामान्य नागरिकांमध्ये भीतीचं वातावरण आहे. अशाच वातावरणात आता एक अत्यंत धक्कादायक घटना समोर आली असून, तिने नांदेडसह संपूर्ण महाराष्ट्रात खळबळ उडवून दिली आहे. नांदेडमध्ये राष्ट्रवादी काँग्रेस (अजित पवार गट) पक्षाच्या एका बड्या नेत्याचं भररस्त्यातून अपहरण करून त्यांना अमानुष मारहाण करण्यात आल्याचा प्रकार उघडकीस आला आहे.

मिळालेल्या माहितीनुसार, राष्ट्रवादी अजित पवार गटाचे प्रदेश सरचिटणीस जीवन घोगरे पाटील यांचं अपहरण करण्यात आलं. अपहरणानंतर त्यांना बेदम मारहाण करण्यात आली असून, या मारहाणीत ते गंभीर जखमी झाले आहेत. धक्कादायक बाब म्हणजे, हा संपूर्ण प्रकार सीसीटीव्ही कॅमेऱ्यात कैद झाला आहे. मारहाणीनंतर काही वेळाने त्यांची सुटका करण्यात आली. सध्या या प्रकरणी पोलीस ठाण्यात तक्रार दाखल करण्याची प्रक्रिया सुरू आहे.

ही घटना आज सकाळी साडेअकराच्या सुमारास घडली असल्याची माहिती समोर आली आहे. नांदेड शहरातील सिडको भागात जीवन घोगरे पाटील हे असताना चारचाकी वाहनातून आलेल्या काही अज्ञात व्यक्तींनी त्यांना अचानक पकडलं. भररस्त्यातून जबरदस्तीने त्यांना गाडीत बसवण्यात आलं आणि त्यानंतर वाहन वेगात निघून गेलं. अपहरण केल्यानंतर काही अंतरावर त्यांना बेदम मारहाण करण्यात आली. या मारहाणीत घोगरे गंभीर जखमी झाले असल्याचं सांगण्यात येत आहे.

मारहाणीनंतर नेमकं काय कारण होतं, कोणत्या वादातून हा प्रकार घडला, याबाबत अद्याप कोणतीही स्पष्ट माहिती समोर आलेली नाही. घोगरे यांचं अपहरण का करण्यात आलं आणि त्यांच्यावर हल्ला करण्यामागे नेमकं काय कारण होतं, याचा तपास पोलीस करत आहेत. या घटनेमुळे राजकीय वर्तुळातही मोठी खळबळ उडाली आहे.

दरम्यान, या संपूर्ण घटनेचे सीसीटीव्ही फुटेज समोर आले असून, त्यात अनेक धक्कादायक दृश्यं दिसत आहेत. सीसीटीव्हीमध्ये घटनास्थळी एक चारचाकी गाडी थांबलेली दिसते. काही क्षणांतच त्या गाडीतून घोगरे यांना जबरदस्तीने ओढून नेण्यात येतं आणि वाहन वेगात घटनास्थळावरून निघून जातं. पुढे त्यांना मारहाण करण्यात आल्याचंही तपासात समोर येत आहे.