Shahrukh Khan : समीर वानखेडेंनी वाढवले शाहरूख खानचे टेन्शन; आज बसला पहिला झटका

बॉलिवूड बादशहा अभिनेता शाहरुख खानला मोठा झटका बसला आहे. नार्कोटिक्स कंट्रोल ब्युरो (NCB) चे माजी झोनल संचालक समीर वानखेडे यांनी दाखल केलेल्या मानहानीच्या याचिकेवर दिल्ली उच्च न्यायालयाने सुनावणीस मान्यता दिली आहे. न्यायालयाने शाहरुख खानच्या रेड चिलीज एंटरटेनमेंट, नेटफ्लिक्स आणि इतर संबंधित कंपन्यांना समन्स जारी केले आहेत.

शाहरुख खानचा मुलगा आर्यन खानने दिग्दर्शित केलेल्या नेटफ्लिक्सवरील 'द बॅड्स ऑफ बॉलिवूड' या वेब सिरीजशी ही याचिका संबंधित आहे. समीर वानखेडे यांनी आरोप केला आहे की, या सिरीजमध्ये त्यांचं आणि ड्रग्ज विरोधी अंमलबजावणी संस्थांचं चुकीचं आणि बदनामीकारक चित्रण करण्यात आलं आहे.

न्यायालयाने शाहरूख खान आणि गौरी खान यांच्या मालकीच्या असणाऱ्या रेड चिलीज एंटरटेनमेंट, नेटफ्लिक्स आणि इतर संबंधित कंपन्यांना सात दिवसांच्या आत लेखी उत्तर दाखल करण्याचे आदेश दिले आहेत. या प्रकरणाची पुढील सुनावणी 30 ऑक्टोबरला होणार आहे.

वानखेडे यांनी न्यायालयाकडे 'द बॅड्स ऑफ बॉलिवूड' या सिरीजच्या प्रसारणावर कायमस्वरूपी बंदी आणि दोन कोटी रुपयांच्या नुकसानभरपाईची मागणी केली आहे. विशेष म्हणजे, ही नुकसानभरपाईची रक्कम टाटा मेमोरियल कॅन्सर हॉस्पिटलला दान करण्यात यावी, अशी मागणी त्यांनी केली आहे. तसेच त्यांनी म्हटले की, या प्रकारच्या सादरीकरणामुळे कायद्याची अंमलबजावणी करणाऱ्या अधिकाऱ्यांबद्दल आणि संस्थांबद्दल चुकीचा संदेश समाजात जाऊ शकतो.

दरम्यान, 'या वेब सिरीजमध्ये ड्रग्ज विरोधी संस्थांचे नकारात्मक चित्रण केले गेले असून त्यामुळे जनतेचा विश्वास कमी होऊ शकतो,” असा दावा वानखेडे यांनी केला आहे. त्यांचा आरोप आहे की आर्यन खान आणि त्यांच्या नावावर असलेले खटले मुंबई उच्च न्यायालय आणि एनडीपीएस न्यायालयात प्रलंबित असताना ही सिरीज जाणीवपूर्वक प्रदर्शित करण्यात आली आहे.