Sharad Pawar : दोन महिने राहिलेत, स्वस्थ बसणार नाही; सरकार बदलण्याचा शरद पवारांचा निर्धार

Sharad Pawar News : आमची ज्यांनी साथ सोडली ते आत्ता भाजप सोबत जाऊन बसले आहेत. 5 वर्षांपूर्वी ज्या मतदाराने यांना मतदान केलं त्या मतदारांना यांनी फसवलं आहे. हे राज्य बदललं आहे, हे आम्ही दोन महिन्याचा आता दाखवून देऊ. दोन महिने राहिले आहेत, राज्यात सरकार बदलल्याशिवाय स्वस्थ बसणार नाही. असा निर्धार शरद पवारांनी व्यक्त केला.

परळी तालुक्यातील राजेभाऊ फड यांनी आज (बुधवार) शरद पवार यांच्या उपस्थितीत राष्ट्रवादी काँग्रेस शरदचंद्र पवार पक्षात प्रवेश केला. त्यावेळी पवारांनी विरोधकांवर टीका करत परळीमध्ये पुन्हा येणार असल्याचे सांगितले.

शरद पवार म्हणाले, राजेभाऊ फड यांनी आमच्याशी संपर्क साधला आणि त्यांनी आपली अस्वस्थता बोलून दाखवली. ज्यांच्या हातात सत्ता आहे त्यांनी ती सत्ता लोकांसाठी वापरायची असते पण तुमच्या भागात ती सत्ता गैर फायद्यासाठी वापरली जाते .ही सत्ता सामान्य लोकांना यातना देण्यासाठी वापरली जाते. त्यामुळे राजेभाऊ यांनी हा निर्णय आज घेतला .

राजकारण हे समाजकारणाला साथ देणारे पाहिजे. दिवस बदलतात, लोकसभेच्या निवडणुकीपूर्वी एक वेगळं वातावरण होतं आणि देशाचे पंतप्रधान बोलत होते 400 पार. पण काय झालं? निवडून आले का?

राज्यात 48 खासदर होते. त्यातील 42 खासदार निवडून येतील, असा मोदींचे सहकारी सांगत होते पण काय झालं? किती निवडून आले? राष्ट्रवादी काँग्रेस आमचा पक्ष 10 जागा लढवल्या आणि 8 जागा निवडून आल्या.

धनंजय मुंडेंच्या विरोधात फड?

राष्ट्रवादी काँग्रेसमध्ये फूट पडली तेव्हा परळीचे आमदार धनंजय मुंडे यांनी अजित पवारांना साथ दिली. धनंजय मुंडे यांच्या विरोधात राष्ट्रवादी काँग्रेस शरदचंद्र पवार पक्षाकडून तगडा उमेदवार निवडणुकीच्या मैदानात उतरवला जाणार आहे. राजेभाऊ फड हे कन्हेरवाडी गावचे सरपंच आहेत. परळी विधानसभा मतदारसंघात महाविकास आघाडीतर्फे निवडणूक लढवण्यास ते इच्छुक असल्याची चर्चा आहे. त्यामुळे राष्ट्रवादी काँग्रेस शरदचंद्र पवार पक्षाकडून त्यांना संधी देण्यात येणार का? याची उत्सुकता कार्यकर्त्यांमध्ये आहे.