Shivsena Vs BJP : शिवसेना-भाजप आमदारांचे जमेना, आता थेट एकनाथ शिंदेंकडे तक्रार; CM फडणवीसांशी बोलण्याची विनंती

Narendra Bhondekar News : नगरपंचायत आणि नगर परिषदेच्या निवडणुकीत एकनाथ शिंदेंची शिवसेनेचे आमदार आणि भाजप आमदारांमधील वाद उफाळून आले आहेत. कोकणात निलेश राणेंनी भाजपला आव्हान दिले आहे. तर, हिंगोलीत आमदार संतोष बांगरांनी भाजप आमदार तानाजी मुटकुळेंच्या विरोधात दंड थोपटले आहेत. आता भंडारा जिल्ह्यात देखील आमदार नरेंद्र भोंडेकर हे भाजप आमदार परिणय फुकेंच्या विरोधात आक्रमक झाले आहेत.

भोंडेकर आणि फुके यांच्यातील तणाव निवडणुकीच्या काळात आणखी वाढला आहे. आमदार भोंडेकर यांनी फुकेंची तक्रार थेट उपमुख्यमंत्री शिंदे यांच्याकडे करून मुख्यमंत्र्यांसोबत याविषयी बोलण्याची विनंती केली आहे.

मुख्यमंत्री देवेंद्र फडवीस, उपमुख्यमंत्री एकनाथ शिंदे आणि उपमुख्यमंत्री अजित पवार हे कधीच एकमेकांवर टीका करीत नाहीत. युती कायम राखण्यासाठी ते नेहमीच संयमाने बोलातात. मात्र भाजपचे आमदार याच्या उलट वागतात. आमच्या जिल्ह्यात फक्त नावालाच मैत्रीपूर्ण वातावरण असून राजकारणाचा दर्जा खालावत चालला असल्याचे आमदार भोंडेकर म्हणाले.

भंडारा जिल्ह्यात भाजपचा एक नेता बेछूट आरोप करतो. महिलांविषयी अपशब्दात बोलून वातावरण खराब करतो,अशा लोकांना रोखा, गरज भासल्याच आपण सर्वांनी मुख्यमंत्री देवेंद्र फडणवीस यांच्यासोबत चर्चा करावी, असे देखील भोंडेकरांनी सांगितले.

राज्यात आपली युती आहे. स्थानिक निवडणुकीतही युती कायम राहली पाहिजे. मैत्रीपूर्ण लढत होत असताना एकमेकांवर आरोप करू नका, संयम बाळगा, युतीतील वाद विकोपाला जाणार नाही याची काळजी घ्या असा सूचना मुख्यमंत्री देवेंद्र फडणवीस आणि महसूलमंत्री चंद्रशेखर बावनकुळे यांच्या केल्या आहेत. मात्र त्या भाजपच्याच नेत्यांकडून पाळल्या जात नाही, असे देखील ते म्हणाले.

भाजप-शिवसेनेतील वाद विकोपाला

विधान परिषदेच्या निवडणुकीत जेव्हा मतदानाची गरज भासते तेव्हा आम्ही महायुतीत म्हणून सर्व मदत करतो. मात्र जेव्हा आमची वेळ येते, गरज भासते तेव्हा शिवसेनेसाठी दरवाजे बंद केले जातात. शिवसेना मोठा पक्ष आहे. राज्यात सत्तेत आहे. शिवसेनेकडेही उमेदवार आहेत असे सांगून त्यांनी भाजपच्या स्थानिक आमदारांची तक्रार केली. यावरून भंडारा जिल्ह्यात शिवसेना आणि भाजप नेत्यांमधील अंतर्गत वाद विकोपाला गेल्याची चर्चा आहे.