SIR form verification Status : SIR फॉर्म भरलात, आता पुढे काय? तुमचे सबमिशन झाले की नाही; पाहा स्टेप बाय स्टेप प्रोसेस

राज्यासह देशभरात सध्या SIR 2026 मोहीम सुरू असून मतदारांकडून मोठ्या प्रमाणावर फॉर्म भरले जात आहेत. या प्रक्रियेसाठी अर्ज करण्याची अंतिम तारीख 8 ऑगस्ट 2026 असल्याने अनेक नागरिक ऑनलाइन आणि ऑफलाइन पद्धतीने फॉर्म सादर करत आहेत. मात्र फॉर्म भरल्यानंतर तो यशस्वीरीत्या सबमिट झाला आहे की नाही, याची खात्री करून घेणेही तितकेच महत्त्वाचे आहे.

अनेक मतदारांनी फॉर्म भरून प्रक्रिया पूर्ण केली असली तरी अर्जाची सद्यस्थिती कशी तपासायची, याबाबत अनेकांना संभ्रम आहे. प्रत्यक्षात ऑनलाइन आणि ऑफलाइन अशा दोन्ही प्रकारे भरलेल्या फॉर्मचे स्टेटस तपासण्याची सुविधा उपलब्ध आहे. त्यामुळे काही सोप्या टप्प्यांद्वारे तुम्ही तुमचा अर्ज यशस्वीरीत्या नोंद झाला आहे की नाही, हे सहज पाहू शकता.

पहिल्यांदा संबंधित पोर्टलवर लॉगिन करावे. ज्यांचे खाते आधीपासून तयार आहे, त्यांना लॉगिन केल्यानंतर त्यांचे नाव दिसेल. ज्यांनी अद्याप खाते तयार केलेले नाही, त्यांनी प्रथम साइन अप करून लॉगिन करणे आवश्यक आहे.

लॉगिन झाल्यानंतर "Fill Enumeration Form" या पर्यायावर क्लिक करावे. पुढील स्क्रीनवर राज्य निवडण्याचा पर्याय दिसेल. त्यामध्ये आपले राज्य निवडल्यानंतर मतदार ओळखपत्रावरील EPIC क्रमांक टाकून शोध घ्यावा.

यानंतर संबंधित मतदाराची माहिती स्क्रीनवर दिसेल. काही प्रकरणांमध्ये नोंदणीकृत मोबाईल क्रमांक टाकावा लागतो. त्यानंतर मोबाईलवर आलेला OTP टाकून पुढील प्रक्रिया पूर्ण करावी. OTP पडताळणी पूर्ण झाल्यानंतर अर्जाची संपूर्ण माहिती दिसते. त्याचबरोबर खाली हिरव्या अक्षरात फॉर्म यशस्वीरीत्या सबमिट झाल्याचा संदेशही दिसतो.

काही मतदारांच्या बाबतीत OTP पडताळणीची आवश्यकता नसते. अशावेळी केवळ EPIC क्रमांक टाकल्यानंतरच अर्जाची स्थिती स्क्रीनवर दाखवली जाते. जर तेथे तुमचा फॉर्म सबमिट झाल्याचा संदेश दिसत असेल, तर तुमचा अर्ज यशस्वीरीत्या स्वीकारला गेला आहे, असे समजावे.

त्यामुळे SIR फॉर्म भरल्यानंतर त्याचे स्टेटस एकदा नक्की तपासा. यामुळे अर्ज व्यवस्थित सादर झाला आहे की नाही, याची खात्री होईल आणि पुढील कोणतीही अडचण टाळता येईल.