Sunetra Pawar: उपमुख्यमंत्रीपदाची शपथ घेतल्यानंतर सुनेत्रा पवारांची खातीही ठरली! थोड्याच वेळात होणार घोषणा; मुख्यमंत्र्यांचं राज्यपालांना पत्र

Sunetra Pawar Porfolio : महाराष्ट्राचे लाडके दादा, माजी उपमुख्यमंत्री आणि राष्ट्रवादी काँग्रेस पक्षाचे प्रमुख दिवंगत अजित पवार यांच्या अपघाती निधनानंतर त्यांच्या पत्नी सुनेत्रा अजित पवार यांनी आज महाराष्ट्राच्या उपमुख्यमंत्रीपदाची शपथ घेतली. शनिवार, ३१ जानेवारी २०२६ रोजी सायंकाळी ५ वाजता हा शपथविधी पार पडला. यानंतर तासाभरात सुनेत्रा पवारांकडं कुठली खात सोपवणार याची घोषणा होणार आहे. यासंदर्भातील पत्रही मुख्यंमत्री राज्यपालांना पाठवलं आहे.

अजित पवार हयात असताना ते राज्याचे उपमुख्यमंत्री तर होतेच पण त्यांच्याकडं अनेक खात्यांचा कारभारही होता. यामध्ये अर्थमंत्रीपद, राज्य उत्पादन शुल्क आणि क्रीडा व युवक कल्याण मंत्री त्याचबरोबर पुणे आणि बीड जिल्ह्याचे ते पालकमंत्री देखील होते. अनेक वर्षे अजित पवारांनी राज्याची तिजोरी अर्थात अर्थखातं यशस्वीपणे सांभाळलं होतं. त्यामुळं आता सुनेत्रा पवार यांच्याकडं अजित पवारांकडं असलेलीच खाती सोपवली जाण्याची शक्यता आहे.

पण यामध्ये अर्थखातं सध्यातरी मुख्यमंत्री देवेंद्र फडणवीस हे आपल्याकडं ठेवू शकतात. कारण हे खातं सांभाळण्यासाठी पुरेसा अनुभव असलेल्या व्यक्तीकडं याची जबाबदारी दिली जाते. त्यामुळं अर्थखातं सुनेत्रा पवारांना मिळण्याची शक्यता कमी आहे. पण उर्वरित इतर दोन खाती ज्यामध्ये राज्य उत्पादन शुल्क आणि क्रीडा व युवक कल्याण विभाग ही खाती त्यांच्याकडं सोपवली जाऊ शकतात. पण पुणे आणि बीडच्या पालकमंत्रीपदाबाबतही आत्ताच घोषणा होण्याची शक्यता नाही. काही दिवसांनंतर याबाबत निर्णय घेतला जाऊ शकतो.

दरम्यान, तासाभरानंतर सुनेत्रा पवारांकडं कुठली खाती असतील याची घोषणा राज्यपालांच्या मंजुरीनंतर करण्यात येईल. त्यामुळं आता शपथविधीनंतर खात्यांबाबतचा विषयही मार्गी लावला जाईल.