Nawab Malik News : मलिकांनी मुद्दा लावून धरत मुंडेंची केली कोंडी; पक्षांतर्गत कुरघोड्यांचे राजकारण आलं बाहेर

Shirdi News : बीडमधील संतोष देशमुख यांच्या हत्याप्रकरणाचे पडसाद राज्यात उमटत आहेत. मंत्री धनंजय मुंडे यांचा निकटवर्तीय 'मकोका' कायद्यात अटक असलेला वाल्मिक कराड याच्यावर हत्येच्या कटाचा गुन्हा आहे. यामुळे मुंडे यांच्या अडचणी वाढल्या आहेत. अडचणीत सापडलेल्या मुंडेंची पक्षातील नेते नवाब मलिक यांच्या मागणीमुळे अधिकच कोंडी झाल्याचे समोर आले आहे.

'एका जिल्ह्यातील प्रकरणामुळे पक्षाची राज्यात बदनामी होत आहे. त्यामुळे पक्ष हितासाठी लवकरात लवकर निर्णय घ्यावा', अशी मागणी माजी मंत्री नवाब मलिक यांनी राष्ट्रवादी काँग्रेस पक्षाच्या शिर्डीतील नवसंकल्प शिबिरात केली. नवाब मलिक यांच्या या मागणीमुळे मंत्री मुंडे यांची पक्षातूनच कोंडी होत असल्याचे समोर आलं आहे.

नवाब मलिक यांनी नवसंकल्प शिबिराच्या पहिल्याच दिवशी याबाबत विधान केल्याची माहिती समोर आल्याने पक्षातील अंतर्गत कुरघोड्यांच्या राजकारणाची चर्चा रंगली आहे. नवाब मलिक यांनी बीड जिल्ह्याचा थेट उल्लेख न करता पक्ष हितासाठी लवकरात लवकर निर्णय घ्यावा, असे म्हटले आहे. स्थानिक स्वराज्य संस्थांच्या निवडणुका तोंडावर आहे. त्यातून या प्रकरणामुळे पक्षाची बदनामी होत आहे. ते पक्षाच्या वाटचालीस योग्य नाही. त्यामुळे पक्ष नेतृत्वाने लवकरात लवकर निर्णय घेऊन कार्यवाही करावी, अशी मागणी मलिक यांनी केली.

अजितददांसमोर केली मागणी

बीड जिल्ह्यातील प्रकरणामुळे पक्षाची बदनामी होत आहे. या प्रकरणात लवकरात लवकर कारवाई झाली पाहिजे. म्हणजेच मंत्री धनंजय मुंडे यांच्यावर कारवाई झाली पाहिजे. राजीनामा घेतला पाहिजे. असा रोख नवाब मलिक यांच्या मागणी पाठीमागे होता. पक्षाचे अध्यक्ष, उपमुख्यमंत्री अजित पवार यांच्या समोरच नवाब मलिक यांनी ही भूमिका मांडल्याचे सांगितले जात आहे.

अजितदादांकडून मंत्री मुंडे यांना अभय

नवसंकल्प शिबिरात अजितदादांनी शेवटी भाषण केले. त्यावेळी मंत्री मुंडे यांनी केलेल्या भाषणाचा उल्लेख केला. धनंजय मुंडे यांनी केलेल्या भाषणातून त्यांच्याविरुद्ध सुरू असलेल्या आरोपांच्या वावटळींना त्यांनी शांत केले आहे, असे म्हणत अजितदादांनी मंत्री मुंडे यांना एक प्रकारे अभय दिल्याचे दिसते.