Tanaji Sawant Meet Eknath Shinde : मोठी बातमी! एकनाथ शिंदेंचा निरोप तानाजी सावंत तातडीने मुंबईत दाखल! बंद दाराआड तब्बल दोन तास चर्चा

Tanaji Sawant News : मागील काही काळापासून माजी मंत्री, आमदारा तानाजी सावंत हे नाराज असल्याच्या चर्चा होत्या. तब्येतीच्या कारणामुळे ते विधीमंडळाच्या अधिवेशनाकडे देखील त्यांनी पाठ फिरवल्याची चर्चा होती. त्यातच त्यांचे बंधू शिवसेनेचे सोलापूर जिल्ह्याचे माजी जिल्हा संपर्कप्रमुख शिवाजी सावंत हे भाजपच्या वाटेवर आहेत. त्यांनी राजीनामा देखील दिला आहे. या पार्श्वभूमीवर शनिवारी (ता.23) तानाजी सावंत तातडीने मुंबईत दाखल झाले. त्यांनी उपमुख्यमंत्री एकनाथ शिंदे याची भेट देखील घेतली.

एकनाथ शिंदे यांच्यासोबत झालेल्या भेटीबाबत आपल्या सोशल मीडियावरून तानाजी सावंत यांनी माहिती दिली आहे. ते म्हणाले, 'एकनाथजी शिंदेसाहेब यांच्याकडून आज मुंबई येथे तातडीने भेटीचा निरोप आला.या निरोपानिमित्त तात्काळ मुंबईला जाऊन त्यांची भेट घेतली.'

'साहेबांसोबत तब्बल 2 तास विविध राजकीय घडामोडींवर आणि राज्याच्या विकासाच्या मुद्द्यांवर सखोल चर्चा झाली.', असे देखील सावंत यांनी सांगितले. दरम्यान, ही तातडीच्या भेटीमागे नेमके काय कारण होते याचे तर्कवितर्क लढवले जात आहेत.

तानाजी सावंत यांचे बंधू शिवाजी सावंत यांनी शिवसेनेच्या कामकाजात विश्वासात घेतले जात नाही, माढा मतदारसंघातील पक्षसंघटनेतील नियुक्त्या परस्पर न सांगता केल्या जात असल्याची तोफ डागत राजीनामा दिला आहे. ते भाजपच्या वाटेवर आहेत. त्यांनी मुख्यमंत्री देवेंद्र फडणवीस यांची भेट देखील घेतली आहे. त्यांच्यासोबत मोठ्या संख्येने शिवसेनेचे पदाधिकारी भाजपमध्ये जाण्यास उत्सुक आहेत. त्या पार्श्वभूमीवर डॅमेज कंट्रोलसाठी एकनाथ शिंदेंनी तानाजी सावंत यांना तातडीने बोलावून घेतल्याची देखील चर्चा आहे.

तानाजी सावंत नाराज का?

शिवसेनेच्या बंडात तानाजी सावंत हे आघाडीवर होते. त्यानंतर शिंदेंच्या मंत्रिमंडळात त्यांना मंत्रिपद देखील मिळाले. मात्र, महायुतीचे सरकार पुन्हा आल्यानंतर देवेंद्र फडणवीस मुख्यमंत्री झाले. सावंत यांना मंत्रिपद न मिळाल्याने हे नाराज होते. त्यांनी पक्षापासून अंतर राखून असल्याची चर्चा होती. त्यांनी विधीमंडळाच्या अधिवेशनाकडे देखील पाठ फिरवली होती.