राज्यात सरकारी शाळांमध्ये शिक्षक होण्याची इच्छा असणाऱ्या उमेदवारांसाठी आनंदाची बातमी आहे. राज्य सरकारने शिक्षक भरतीबाबत महत्त्वाचा निर्णय घेतला असून, येत्या काळात मोठ्या प्रमाणावर नवीन शिक्षकांची नियुक्ती केली जाणार आहे. जिल्हा परिषद, महापालिका तसेच नगरपालिका शाळांमध्ये सुमारे 9 हजार शिक्षकांची भरती होणार असून, यामुळे अनेक रिक्त पदे भरली जाणार आहेत आणि शिक्षण व्यवस्थेला बळ मिळणार आहे.
राज्यातील अनेक भागांमध्ये सरकारी शाळांमध्ये शिक्षकांची कमतरता दीर्घकाळापासून जाणवत आहे. काही ठिकाणी विद्यार्थ्यांची संख्या जास्त असूनही आवश्यक तेवढे शिक्षक उपलब्ध नाहीत. परिणामी विद्यार्थ्यांच्या शिक्षणावर परिणाम होत होता. ही समस्या लक्षात घेऊन हिवाळी अधिवेशनात अनेक आमदारांनी शिक्षक भरतीची जोरदार मागणी केली होती. त्याच पार्श्वभूमीवर आता राज्य सरकारने मेगाभरतीचा निर्णय घेतला आहे.
या भरती प्रक्रियेमध्ये केवळ सध्या रिक्त असलेल्या पदांचाच समावेश नाही, तर २०२४-२५ या शैक्षणिक वर्षात आणि मे २०२६ पर्यंत सेवानिवृत्त होणाऱ्या शिक्षकांच्या जागादेखील भरल्या जाणार आहेत. त्यामुळे भविष्यात पुन्हा शिक्षकांची कमतरता भासू नये, हा या निर्णयामागील प्रमुख उद्देश आहे. उपलब्ध माहितीनुसार, जिल्हा परिषद, महापालिका आणि नगरपालिका शाळांमध्ये सध्या सुमारे ५७०० पदे रिक्त आहेत.
शिक्षक भरतीसाठी राज्यात पवित्र पोर्टलचा वापर करण्यात येणार आहे. ही संपूर्ण प्रक्रिया ऑनलाइन पद्धतीने पारदर्शक रीतीने राबवली जाणार असून, उमेदवारांना अर्ज करणे अधिक सोपे होणार आहे. शिक्षण विभागातील अधिकाऱ्यांनी दिलेल्या माहितीनुसार, मार्च महिन्यापासून अर्ज प्रक्रिया सुरू होण्याची शक्यता आहे. त्यामुळे इच्छुक उमेदवारांनी आवश्यक कागदपत्रांची तयारी ठेवण्याचे आवाहन करण्यात येत आहे.
२५ मार्च २०२४ रोजी झालेल्या निर्णयानुसार, जिल्हा परिषदेच्या शाळांसाठी २०२५-२६ या शैक्षणिक वर्षाची संचमान्यता पूर्ण करण्यात आली आहे. या प्रक्रियेमध्ये काही ठिकाणी शिक्षकांची संख्या जास्त ठरत असल्याचे आढळले आहे. त्यामुळे पहिल्यांदाच अतिरिक्त ठरणाऱ्या शिक्षकांचे समायोजन केले जाणार आहे. या समायोजनानंतर रिक्त पदांपैकी सुमारे ८० टक्के पदे भरली जाणार आहेत, असा निर्णय घेण्यात आला आहे.
राज्य सरकारने सर्व जिल्हा परिषद, महापालिका आणि नगरपालिका प्रशासनांना स्पष्ट सूचना दिल्या आहेत. मे २०२६ पर्यंत निवृत्त होणाऱ्या शिक्षकांच्या पदांचा तपशील समाविष्ट करून त्याची जाहिरात पवित्र पोर्टलवर अपलोड करण्यास सांगण्यात आले आहे. यामुळे भरती प्रक्रियेत कोणतीही अडचण येणार नाही आणि वेळेत नियुक्त्या पूर्ण करता येतील.
या मेगाभरतीमुळे हजारो उमेदवारांना सरकारी शिक्षक होण्याची संधी मिळणार आहे. स्थिर नोकरी, समाजसेवेची संधी आणि शिक्षण क्षेत्रात योगदान देण्याचे स्वप्न पाहणाऱ्यांसाठी हा मोठा दिलासा मानला जात आहे. तसेच या भरतीमुळे सरकारी शाळांमधील शिक्षणाची गुणवत्ता सुधारण्यासही मदत होणार आहे. आता उमेदवारांचे लक्ष पवित्र पोर्टलवरील अधिकृत जाहिराती आणि अर्ज प्रक्रियेच्या तारखांकडे लागून राहिले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.