Uddhav Thackeray Dasara Melava : हाकेच्या अंतरावर उद्धव ठाकरेंचा दसरा मेळावा, राज ठाकरे गैरहजर का?

Raj Thackeray News : शिवसेना उद्धव बाळासाहेब ठाकरे पक्षाचा दसरा मेळावा शिवतीर्थावर संपन्न झाला. उद्धव ठाकरेंनी आपल्या भाषणात महाराष्ट्र सरकार आणि एकनाथ शिंदेंचा समाचार घेतला. मात्र, ठाकरे बंधुंची युतीची चर्चा सुरू असताना मनसे प्रमुख राज ठाकरे हे मेळाव्याला उपस्थित राहतील, अशी शक्यता होती. मात्र, ते मेळाव्याला न आल्याने चर्चांना उधाण आले होते.

दसरा मेळाव्याच्या काही दिवस आधी उद्धव ठाकरे हे राज ठाकरेंच्या निवासस्थानी गेले होते. त्यामुळे दसरा मेळाव्याचे निमंत्रण देण्यासाठी ते गेल्याच्या चर्चा होत्या. मात्र, अधिकृत तशी कोणतीही माहिती देण्यात आली नव्हती. दसरा मेळावा हा शिवसेना उद्धव बाळासाहेब ठाकरे पक्षाचा असतो. त्यात प्रमुख मार्गदर्शन हे उद्धव ठाकरेंचे असते त्यामुळे मनसे प्रमुख राज ठाकरे यांना बोलण्यात आले नव्हते आणि त्यात काही वावगे देखील नाही, असे शिवसेनेचे पदाधिकारी सांगत आहेत.

नाव न छापण्याच्या अटीवर शिवसेना उद्धव बाळासाहेब ठाकरे पक्षाच्या पदाधिकाऱ्याने सांगितले की, राज ठाकरे यांना मेळाव्याचे अधिकृत निमंत्रण होते की नाही, याची माहिती आमच्याकडे नाही. मात्र, या विषयी काही बोलू नये, असे अप्रत्यक्ष सूचना आम्हाला आहेत. मात्र, भाषणामध्ये उद्धवसाहेबांना स्पष्ट केले की, दोघे भाऊ एकत्र राहण्यासाठी एकत्र आले आहेत. त्यामुळे राज ठाकरेसाहेब मेळाव्याला नव्हते, याचा वेगळा अर्थ काढण्याची गरज नाही.

'ते' शिवतीर्थही आपलंच...

राज ठाकरेंच्या निवासस्थानाचे नाव हे 'शिवतीर्थ' आहे. ज्या शिवाजी पार्कवर शिवसेना उद्धव बाळासाहेब ठाकरे पक्षाचा मेळावा झाला त्याला देखील शिवतीर्थ संबोधले जाते. संजय राऊत यांनी आपल्या भाषणात म्हणाले, हे शिवतीर्थ आपल्या शिवसेनेचे आहे. आणि या शिवतीर्थाच्या पलीकडे अजून एक 'शिवतीर्थ' आहे ते सुद्धा आपलंच मानायला पाहिजे.

उद्धव ठाकरे काय म्हणाले?

उद्धव ठाकरेंनी आपल्या भाषणात म्हणाले की, आत्ता कोणतरी बोललं उद्धव ठाकरे-राज ठाकरे एकत्र येणार का? मग पाच जुलैला काय केलंय आम्ही. तेव्हा मी बोललोय, एकत्र आलोय एकत्र राहण्यासाठी. जेथे माझ्या मराठी भाषेचा घात होत असेल तेथे मी मराठी माणसामध्ये फूट पडू देणार नाही.