भाजप नेते गिरीश महाजन यांच्यावर गुन्हा दाखल

जळगाव : जळगाव येथे मोर्चा काढून जमावबंदी चे उल्लघन केल्या प्रकरणी भाजप नेते गिरीश महाजन (Girish Mahajan) यांच्यासह भाजप (BJP) नेत्यांवर गुन्हा दाखल करण्यात आला आहे.

भारतीय जनता पक्षाच्या वतीने सोमवार (ता.१) रोजी जळगाव जिल्हाधिकारी कार्यालयावर शेतकरी मोर्चा काढण्यात आला होता. जळगाव जिल्ह्यात जिल्हाधिकारी यांनी जमावबंदीचे आदेश लागू केले आहेत. तसेच कोविडचे निर्बंध देखील सुरू आहेत. अशात भारतीय जनता पक्षाने मोर्चा काढून हजारोंचा जमाव एकत्र केला होता.

या प्रकरणी पोलीस कर्मचारी राकेश दुसाने यांनी दिलेल्या फिर्यादीवरुन माजी मंत्री गिरीश महाजन, भाजपचे महानगराध्यक्ष दीपक सुर्यवंशी, खासदार उन्मेश पाटील, रक्षा खडसे, आमदार सुरेश भोळे, मंगेश चव्हाण, चंदुलाल पटेल, संजय सावकारे, जिल्हा परिषद अध्यक्षा रंजना पाटील, उपाध्यक्ष लालचंद पाटील यांच्या विरुद्ध जिल्हापेठ पोलीस ठाण्यात गुन्हा दाखल करण्यात आला आहे. या प्रकरणी पुढील तपास पोलिस करीत आहेत.