BJP Sujay Vikhe controversy : हा कुठला प्रसाद? ते जेवणचं..; साईप्रसादावर सुजय विखेंचं पुन्हा विधान!

Sai Baba prasadalaya issue : भाजपचे माजी खासदार सुजय विखे पाटील यांनी शिर्डी संस्थानमधील साईबाबा प्रसादालयातील प्रसादावरून पुन्हा विधान केलं आहे.

'म्हणे हा प्रसाद आहे. प्रसाद काय असतो, प्रसादात घुगऱ्या अन् लापसी असते. पण हे जेवण आहे. प्रसाद नाही,' असे सुजय विखे पाटील यांनी म्हटले आहे. विखे पाटलांनी प्रसादावर विधान करताच, पुन्हा वाद ओढून घेतला आहे.

सुजय विखे पाटील (Sujay Vikhe) म्हणाले, "'एमआयडीसी'मुळे रोजगार निर्मिती होईल. आपला हॉटेल व्यवसाय चालण्यासाठी मी आवाज उठवला की, प्रसादालय देखील बंद करा. पार अख्ख्या जगामध्ये माझ्यावर टीका झाली. म्हणे हा प्रसाद आहे. प्रसाद काय असतो, प्रसादात घुगऱ्या अन् लापसी असते. हा कुठला प्रसाद, ज्यामध्ये पोळी पण आहे, भात पण आहे, मिठाई पण आहे, वरण पण आहे, डाळ पण आहे. हे जेवण झालं. हा प्रसाद नाही." 

'शिर्डीमध्ये (Shirdi) येणाऱ्या, भक्तांनी येऊन प्रसाद घ्यावं, यासाठी आमचा विरोध नाही. पण रात्री दारू पिऊन प्रसाद खायला जायचं. इथं जेवढे साईभक्त म्हणून फिरत होते, ते साईभक्तच नव्हते. भिकारी-गुन्हेगार जेवायचे, मागे रूमला झोपायचं. परत सकाळी आपल्या कामाला लागायचं. हे बंद होणार. हे बंद झालं पाहिजे,' असे सुजय विखे पाटील यांनी ठामपणे म्हटले.

जेव्हा ते मर्डर झाले होते...

'मी आवाज उठवल्यानंतर, टीका झाली. पण मला विश्वास होता की, शिर्डी माझ्या पाठीमागे उभी आहे. जेव्हा ते मर्डर झाले, तेव्हा लोक म्हणत होते की, सुजय विखे खरं बोलत होता. आपण ब्रेक दर्शन सुरू केलं, नाहीतर सकाळी येऊन माणूस एक तासात पुन्हा घरी जायचा. लोक थांबले पाहिजेत, जसं आपण ब्रेक दर्शन सुरू केलं. तिरुपतीला गेल्यानंतर तिथं आपल्याला एक दिवस अगोदर जाऊन थांबतोच ना,' याकडे सुजय विखे पाटील यांनी लक्ष वेधलं.

विखेंनी वाद ओढून घेतला?

सुजय विखे पाटील यांनी शिर्डीतील साई प्रसादावर पुन्हा विधान केलं आहे. त्यांचे हे विधान म्हणजे, ऐन नगरपालिका निवडणुकीत वाद ओढून घेण्यासारखं आहे. जानेवारीमध्ये देखील सुजय विखे पाटील यांनी शिर्डीतील प्रसादालयातील जेवणावर विधान केलं होते. त्यामुळे राज्यसह देशात बराच वादळ उठलं होतं.

विखेंचं जुनं विधान काय होतं

"साई संस्थानच्या प्रसादालयातील मोफत जेवण बंद करा. जे पैसे अन्नदानात जातात, ते पैसे आमच्या मुलांच्या आणि मुलींच्या भविष्यासाठी, शिक्षणासाठी खर्च करा. अख्खा देश इथं येऊन फुकट जेवण करतोय. महाराष्टातील सगळे भिकारी इथं गोळा झाले आहेत. हे योग्य नाही. या विरोधात आंदोलनाची वेळ आली, तर आम्ही आंदोलन करू. शिर्डीत कोट्यवधी रुपये खर्च करून शैक्षणिक संकुल उभारण्यात आलं. मात्र तिथं चांगले शिक्षक नाहीत. इंग्लिश विषय शिकवणाऱ्यालाच इंग्रजी येत नाही. इंग्लिश विषयाचा शिक्षक मराठीत इंग्लिश शिकवतोय. याचा काय उपयोग?” असे विधान सुजय विखे पाटील यांनी केले होते.

विरोधकांच्या प्रतिक्रियांकडे लक्ष

आता पुन्हा एकदा सुजय विखे पाटील यांनी प्रसादालयातील जेवणावर विधान केलं आहे. नगरपालिका निवडणुकांमध्ये धामधुमीत हे विधान केल्याने, त्याचे काय पडसाद उमटतात, याकडे आता लक्ष असणार आहे. सुजय विखे पाटलांच्या या विधानाचं विरोधक किती भांडवल करतात, हे पाहणं उत्सुकतेचं ठरणार आहे.