Balasaheb Thorat Politics: बाळासाहेब थोरात यांनी तो व्हिडिओ भर सभेत ऐकवला, एकनाथ शिंदे यांचा डाव उलटवला!

Thorat Vs Eknath Shinde News: नगरपालिका निवडणुकांचा प्रचार शिगेला पोहोचला आहे. त्यामध्ये सर्वाधिक आश्वासने देण्यात उपमुख्यमंत्री एकनाथ शिंदे सर्वात पुढे आहेत. मात्र त्यांचा हा डाव संगमनेर मध्ये उलटा पडला आहे.

संगमनेर नगरपालिका निवडणुकीचा फड माजी मंत्री बाळासाहेब थोरात विरुद्ध शिवसेनेचे आमदार अमोल खताळ यांच्यात रंगला आहे. त्यामुळे राजकारण चांगलेच तापले आहे. सभा आणि प्रति सभा दोन्हीही चर्चेचा विषय आहेत.

उपमुख्यमंत्री एकनाथ शिंदे यांची दोन दिवसांपूर्वी संगमनेर शहरात सभा झाली. यावेळी उपमुख्यमंत्री शिंदे यांनी शिवसेना शिंदे पक्षाचे आमदार अमोल खताळ यांच्यावर कौतुकाचा वर्षाव केला. ही निवडणूक खताळच जिंकणार असा दावाही त्यांनी केला.

उपमुख्यमंत्री शिंदे यांच्या नगरपालिका निवडणुकीच्या प्रत्येक सभेत ते घोषणांचा पाऊस पाडतात. नगर विकास खाते आपल्याकडे आहे. त्यामुळे मतदार आणि उमेदवारांनी काळजीच करायची नाही असा त्यांचा सूर असतो.

मागण्या पाहून ते थेट मंत्र्यांना सभा सुरू असतानाच फोन लावतात. लगेच मागणी मंजूर झाल्याची घोषणाही होते. मागणी मान्य झाल्याने उपस्थिताकडूनही टाळ्यांचा कडकडाट व प्रतिसाद मिळतो. त्यांचा हा फंडा काँग्रेस नेते थोरात यांनी शिंदेंवरच उलटवला.

राजकारणात धुरंदर पैलवान असल्याचा व आपल्या डावाने विरोधी पक्ष सावरला नसल्याचा दावा शिंदे करतात. मात्र त्यांचा एक डाव संगमनेर मध्ये उलटा पडला आहे. आमदार सत्यजित तांबे आणि माजी मंत्री बाळासाहेब थोरात यांनी त्यांचे अक्षरश: वस्त्रहरण केले. शिंदे यांचे प्रयत्न उघडे पडल्याने आमदार खताळ हे देखील अडचणीत येण्याची चिन्हे आहेत.

उपमुख्यमंत्री शिंदे यांनी संगमनेर येथे सभेत आरोग्यमंत्र्यांना फोन लावला. संगमनेर शहरासाठी शंभर खाटांचे महिला रुग्णालय मंजूर केल्याचे आश्वासन मंत्र्यांकडून घेतले. उदय सामंत यांना तसाच फोन करून स्पीकर वरून उपस्थित त्यांना एमआयडीसी मंजूर केल्याचे ऐकवले.

उपमुख्यमंत्री शिंदे यांच्या या फोनची आमदार तांबे यांनी पोलखोल केली. संबंधित रुग्णालय श्रीथोरात महसूल मंत्री असताना ८ डिसेंबर 20 रोजी मंजूर झाल्याचे पत्रच त्यांनी दाखवले. त्यानंतर महाविकास आघाडीचे सरकार गेले. त्यामुळे पाठपुरावा करण्याची जबाबदारी सत्तेत असलेल्या शिंदे यांच्यावरच होती. मात्र त्यांनी हे सर्व निवडणूक प्रचाराच्या सभेत लपवले. सिनेस्टाईल थाटात श्रेय घेण्याचा प्रयत्न केला.

एमआयडीसी मंत्री उदय सामत यांनी मंजूर केल्याचे शिंदे यांनी स्पीकर फोनवरून ऐकवले होते. माजी मंत्री थोरात यांनी शिंदे यांनी पांढरकवडा येथे देखील अशाच प्रकारचे स्पीकरवर फोन ऐकवून एमआयडीसी मंजूर केल्याचे सांगितले होते. संगमनेर आणि पांढरकवडा या दोन्ही फोनची रेकॉर्डिंग त्यांनी भर सभेत ऐकवली. त्यामुळे मुरब्बी थोरात यांनी उपमुख्यमंत्री एकनाथ शिंदे यांचे अक्षरशा वस्त्रहरण केले.

उपमुख्यमंत्री शिंदे यांच्या सभेचा परिणाम साधण्यासाठी आमदार खताळ प्रयत्नशील होते. मात्र थोरात यांनी टाकलेल्या डावाने आमदार खताळ हेच अडचणीत येण्याची चिन्हे आहेत. उपमुख्यमंत्री शिंदे यांनी राज्यभर वापरलेला फंडा मुरब्बी थोरात यांच्या संगमनेरमध्ये मात्र उलटा पडला आहे. त्यामुळे उपमुख्यमंत्री शिंदे यांची ही सभा चांगलीच चर्चेत आली आहे.

-------