Nagar Urban Bank Fraud : राजेंद्र डोळेकडून कुवत नसलेल्या फर्मला कर्ज वाटप

Nagar Urban Bank Fraud : नगर अर्बन बँकेच्या 291 कोटींच्या घोटाळ्याप्रकरणी बँकेचे सातारा जिल्ह्यातील अधिकारी राजेंद्र केशव डोळे याला अटक करण्यात आली. न्यायालयाने त्याला 19 जूनपर्यंत पोलिस कोठडी ठेवण्याचा आदेश दिला आहे. नगर पोलिस दलातील आर्थिक गुन्हे शाखा पोलिसांनी ही कारवाई केली. या गु्न्ह्यात आतापर्यंत 12 जणांना अटक झाली आहे.

राजेंद्र डोळे याला पुण्यातून आर्थिक गुन्हे शाखा पोलिसांनी (Police) ताब्यात घेतले. रात्री उशिरापर्यंत चौकशी केल्यानंतर पोलिसांनी त्याला अटक केली. नगर अर्बन बँकेच्या फाॅरेन्सिक आॅडिटच्या अहवालानुसार पोलिसांकडून संशयितांची चौकशी सुरू आहे. काही संचालक, अधिकारी, कर्जदार, अशी एकूण 12 जणांना अटक झाली आहे. या घोटाळ्यात इतर अधिकाऱ्यांचे जबाब देखील नोंदवण्यात आले आहेत.

राजेंद्र डोळे याच्यावर आर्थिक गु्न्हे शाखा पोलिसांना संशय होता. राजेंद्र डोळे हा बँकेच्या कर्जविभागात अधिकारी म्हणून कार्यरत होता. याशिवाय बँकेत अपहार झाल्याच्या कालावधीत सहायक मुख्य व्यवस्थापक या पदावर कार्यरत होता.

पुष्कराज ट्रेडिंग, जिजाई मिल्क प्रोडक्स फर्म, एस. एस. साई डेव्हलपर्स, तुकाराम एखंडे, सुरेश इंडस्ट्रीज, स्वप्नील इंडस्ट्रीज, के. के. विद्युत, श्री गणेश एजन्सी, नयन एंटरप्रायजेस, यशराज वास्तू, नागेश पाटील आणि इतर कर्जदारांना कुवत नसताना तसेच कर्जास पुरेपुर तारण नसताना कर्जप्रकरणांना शिफारस दिली. बँकेतील रकमेचा अपहार (Fraud) केला. तसेच राजेंद्र डोळे याचे अर्बन बँकेतील बचत खात्यात मोठ्या स्वरुपात रोख रकमा जमा करण्यात आल्या आहेत. या रकमांची चौकशीसाठी पोलिसांनी न्यायालयाकडे राजेंद्र डोळे याच्या कोठडीची मागणी केली.

पोलिसांना त्यांच्यावर पहिल्यापासून संशय होता. त्याला चौकशीसाठी ताब्यात घेतल्यानंतर अटक केली. अटकेनंतर राजेंद्र डोळे याला पोलिसांनी न्यायालयासमोर हजर केले. न्यायालयाने त्याला 19 जूनपर्यंत पोलिस कोठडीत ठेवण्यात आदेश दिला. दरम्यान, या गुन्ह्यात अटक असलेल्या आरोपींनी जामिनासाठी तर, काहींनी अटकेपासून संरक्षण मिळावे यासाठी अटकपूर्व जामीन दाखल केले आहेत. यावर न्यायालयात 18 जूनला सुनावणी होणार आहे.