Ajit Pawar Politics: अजित पवार म्हणाले, `तो` राग मतदानातून व्यक्त करू नका

Ajit Pawar News: उपमुख्यमंत्री अजित पवार यांनी राष्ट्रवादी काँग्रेस अजित पवार पक्षाच्या पदाधिकाऱ्यांना सजग होण्याचे निर्देश दिले आहेत. ते म्हणाले, शेवटचे दोन दिवस शिल्लक आहेत. त्यामुळे दगा फटका होऊ देऊ नका. जागरूक राहून काम करा.

महायुतीच्या योजनांमुळे जनता खुश आहे. त्यामुळे महाविकास आघाडीचे नेते जाणीवपूर्वक खोटे बोलतात. या योजनांसाठी पैसे कुठून आणणार, असे विचारतात. मात्र तुम्ही चिंता करू नका. महाराष्ट्राच्या योजना सुरूच राहतील. पैसे कमी पडले तर जपान किंवा जागतिक बँकेकडून पैसे आणू मात्र योजना सुरूच ठेवू, असा दावा उपमुख्यमंत्री अजित पवार यांनी केला.

राष्ट्रवादी काँग्रेससह महायुतीचे सरकार सर्वसामान्य नागरिक आणि समाजाच्या सर्व घटकांसाठी उत्तम काम करीत आहे. त्यासाठी अनेक योजना आम्ही राबवित आहोत. या योजनांचा धसका विरोधी पक्षाच्या लोकांनी घेतला आहे. त्यामुळे त्यांच्याकडे आता प्रचाराला मुद्देच राहिलेले नाहीत, असा दावा मुख्यमंत्री पवार यांनी केला.

महाराष्ट्रातील अनेक प्रकल्प गुजरातला गेले आहेत. त्यामुळे रोजगाराच्या संधी गेल्या. यावर महाविकास आघाडीच्या नेत्यांचा प्रचारात भर आहे. काँग्रेस पक्षाच्या राष्ट्रीय नेत्यांनीही दहा लाख कोटींची गुंतवणूक गुजरातला गेल्याचा दावा केला आहे. त्याचा परिणाम मतदारांवर होत असल्याचे बोलले जाते. त्याची दखल उपमुख्यमंत्री पवार यांनी घेतली.

यासंदर्भात त्यांनी विरोधकांकडून जाणीवपूर्वक बदनामी करण्यात येत आहे, असा दावा केला. या बदनामीला उत्तर कार्यकर्त्यांनीच द्यावे. कोणतेही उद्योग गुजरातला जात नाहीत. राज्यात मुख्यमंत्री आणि आम्ही दोन उपमुख्यमंत्री कशासाठी बसलो आहोत. महाराष्ट्राचे नुकसान होईल, असं कोणतंही काम आम्ही होऊ देणार नाही. विरोधकांकडे मुद्दे नसल्याने ते अपप्रचार करतात, असे ते म्हणाले.

उपमुख्यमंत्री पवार यांनी हरियाणा प्रमाणेच महाराष्ट्रातही मोठा प्रयोग होणार आहे. भारतीय जनता पक्षाच्या नेत्यांनी महाराष्ट्रात कोणत्याही परिस्थितीत महायुतीची सत्ता येईल, असा शब्द मला दिला आहे. त्यामुळे विरोधकांनी कितीही अपप्रचार केला तरी निवडणूक निकालावर काहीही परिणाम होणार नाही, असा विश्वास त्यांनी व्यक्त केला.

उपमुख्यमंत्री पवार यांनी देवळालीच्या आमदार सरोज अहिरे यांच्यासाठी शनिवारी गिरणारे येथे सभा घेतली. यावेळी त्यांनी आमदार अहिरे यांची ही पहिलीच टर्म आहे. त्यामुळे कोणी दुखावले गेले असेल तर, त्याचा राग मतदानातून काढू नका. त्यांना समजून घ्या. शेवटचे दोन दिवस शिल्लक आहेत. त्यामुळे कार्यकर्त्यांनी अधिक जागरूक होऊन काम करावे. निवडणूक आपल्या हातात आहे. आमदार अहिरे यांच्यासाठी मतदारसंघात अनेक विकास कामांना मी पुढाकार घेऊन निधी दिला आहे. त्यावर माझे बारीक लक्ष असेल असेही सांगितले.

------