Amol Patil Politics: एकनाथ शिंदेंचे आमदार अमोल पाटील राष्ट्रवादीवर का भडकले...

Eknath Shinde politics: शिवसेना एकनाथ शिंदे पक्षाचे आमदार अमोल पाटील यांचा मतदार संघातील विविध सामाजिक संस्थांनी सत्कार केला. यावेळी आमदार पाटील यांनी विरोधकांवर चांगलीच आग पाखड केली.

एरंडोल मतदारसंघात शिवसेना एकनाथ शिंदे पक्षाचे आमदार अमोल पाटील मोठ्या मताधिक्याने विजयी झाले. या निमित्त बडगुजर आणि साळी समाजांसह विविध सामाजिक संस्थांनी त्यांचा सत्कार केला. यावेळी आमदार पाटील यांनी आपल्या विरोधकांवर टीका केली.

आमदार पाटील म्हणाले, मी राज्य शासनाच्या विविध योजनांची अतिशय परिश्रम घेऊन अंमलबजावणी केली. प्रत्येक नागरिकापर्यंत पोहोचलो. प्रत्येक घरामध्ये मदत पोहोचविण्यासाठी काम केले. त्यामुळे मतदारांनी मला विधानसभा निवडणुकीत संधी दिली आहे.

मला जातीयवाद मान्य नाही. सर्व समाजांना मी समान मानतो. राजकीय व सामाजिक क्षेत्रात काम करताना मी कधीही जातीवाद केलेला नाही. त्यामुळे सर्व समाजाचे कार्यकर्ते माझ्याबरोबर असतात विरोधकांना याचीच पोटदुखी झाली आहे. सर्व समाजांना न्याय देण्याचा प्रयत्न मी केला आहे. शासनाच्या माध्यमातून प्रत्येकापर्यंत विकास पोहोचला पाहिजे ही भूमिका आहे. प्रत्येकाला न्याय देताना जातीयवाद करणे मला मान्य नाही.

मात्र माझ्या विरोधकांनी विधानसभा निवडणुकीत माझ्या विरोधात जातीयवादी प्रचार केला. समाजात तेढ निर्माण करण्याचा विरोधकांचा प्रयत्न होता. मात्र मतदारांनी जातीयवादी प्रचार करणाऱ्यांना योग्य धडा शिकवला. म्हणूनच आगामी काळातही जातीय द्वेष निर्माण करणाऱ्यांपासून मतदारांनी दूर राहावे.

एरंडोल मतदारसंघात महायुतीचे उमेदवार म्हणून शिवसेना शिंदे पक्षाचे अमोल पाटील यांनी ५० हजाराहून अधिक मताधिक्याने विजय संपादन केला. त्यांच्या विरोधात राष्ट्रवादी काँग्रेस शरदचंद्र पवार पक्षाचे नेते व माजी मंत्री डॉ सतीश पाटील यांना ४४,७५६ तर अपक्ष उमेदवार भगवान महाजन यांना ४१,३९५ मते मिळाली होती. त्यामुळे ही निवडणूक प्रचाराच्या स्तरावर अतिशय चुरशीची होती. त्यात आमदार पाटील यांना परिश्रम घ्यावे लागले त्यामुळे त्यांनी विरोधकांवर आपला राग व्यक्त केला.

-----