Nashik Kumbh Mela : कुंभमेळ्याबाबत दुखावलेल्या मंत्री, आमदारांची का होतेय मनधरणी?

Nashik News: महाकुंभमेळ्यात प्रयागराजला घडलेल्या दुर्घटनेने महाराष्ट्रातील सरकारही सजग झाले आहे. त्यामुळे नाशिकच्या सिंहस्थ कुंभमेळ्याच्या तयारीबाबत यंत्रणा सक्रिय झाल्या आहेत. यामध्ये सगळ्यांना सहभागी करण्याचा त्यांचा प्रयत्न आहे.

नाशिकच्या सिंहस्थ कुंभमेळ्याच्या तयारी संदर्भात जानेवारी महिन्यात बैठक झाली. मुख्यमंत्री देवेंद्र फडणवीस यांच्या उपस्थितीत ही बैठक झाली. मात्र या बैठकीत नाशिकच्या तीनही मंत्री आणि लोकप्रतिनिधींना डावलण्यात आले होते.

शासनाचे अवर मुख्य सचिव एकनाथ डवले यांच्या उपस्थितीत नाशिकला बैठक झाली. या बैठकीत प्रशासनाच्या उपाययोजना आणि प्रस्तावांवर चर्चा झाली. यामध्ये सिंहस्थ सुरक्षित आणि उत्तम प्रकारे पार पाडण्याबाबत विविध सूचना करण्यात आल्या. त्यात सर्व लोकप्रतिनिधींनाही निमंत्रीत केले होते.

विशेष म्हणजे या बैठकीला कृषिमंत्री माणिकराव कोकाटे अन्न व औषध प्रशासन मंत्री नरहरी झिरवाळ आणि शालेय शिक्षण मंत्री दादा भुसे यांसह विविध लोकप्रतिनिधींनाही निमंत्रित करण्यात आले होते. या निमित्ताने मुंबईत झालेल्या बैठकीत लोकप्रतिनिधी आणि मंत्र्यांना महत्त्व देण्यात आले नव्हते. त्याबाबत उघडपणे नाराजी व्यक्त करण्यात आली.

बैठकीतील चर्चेदरम्यान लोकप्रतिनिधींनी याबाबत अनेक तक्रारी केल्याचे कळते. त्याची दखल घेत प्रशासनाने नाशिकचे सर्व मंत्री आणि लोकप्रतिनिधींनी आपले प्रस्ताव तसेच सूचना कराव्यात अशी विनंती केली. या सूचनांचा गांभीर्याने विचार केला जाईल, असे त्यांनी स्पष्ट केले.

या निमित्ताने नाराज लोकप्रतिनिधींची मनधरणी करण्याचा प्रयत्न प्रशासनाकडून होत असल्याचे स्पष्ट झाले. सिंहस्थ कुंभमेळ्यात सुमारे साडेतीन हजार कोटी रुपयांचा विकास आराखडा तयार करण्यात आला आहे. यामध्ये विविध पायाभूत सुविधांचा समावेश आहे. या सुविधा प्रामुख्याने नाशिक शहराशी संबंधित आणि लगतच्या मतदारसंघात होतील.

आमदार आणि मंत्र्यांना कुंभमेळ्याच्या विकास आराकड्यात विशेष रस आहे. त्या दृष्टीने आता राजकीय हालचाली गतिमान झाल्या आहेत. महाकुंभमेळ्यात झालेल्या दुर्घटनेमुळे प्रशासन अधिक सावध झाले आहे. या संदर्भात कोणाचीही नाराजी परवडणारी नसल्याने प्रशासनाने अचानक आपली भूमिका बदलल्याने तो चर्चेचा विषय ठरला आहे.