Raver APMC Election Results : रावेर बाजार समितीत 'मविआ'ची आघाडी ; आठ जागा पटकाविल्या..

Raver APMC Election Results : राज्यातील 95 बाजार समित्यांची आज (29 एप्रिल) मतमोजणी होत आहे. अनेक ठिकाणचे निकाल हाती येत आहेत. काही ठिकाणी आज मतदान होणार आहे. हाती आलेल्या निकालात महाविकास आघाडीने सरशी मारली आहे. तर सत्ताधाऱ्यांना मोठा धक्का बसला आहे.

रावेर बाजार समितीत महाविकास आघाडीने बाजी मारली आहे. प्रारंभीच्या निकालात महाविकास आघाडी आठ तर भाजप शिंदे गट केवळ एका जागेवर विजयी झाले. रावेर बाजार समितीत एकूण अठरा जागा आहेत. त्यापैकी ९ जांगाचे निकाल जाहीर झाले आहेत. त्यात महाविकास आघाडीने आठ जागा पटकाविल्या आहेत.

हमाल मापारी मतदार संघातून सैय्यद असगर सैय्यद तुकडू, ग्रामपंचायत आर्थिक दुर्बल घटकातून पाडुरंग शिवदास पाटील, विकास सोसायटी मतदार संघातून सचिन रमेश पाटील,विकास सोसायटी भटक्या विमुक्त मतदार संघातून जयेश रविंद्र कुयटे विजयी झाले आहेत.

भाजप शिंदे गटाला एक जागा मिळाली असून ग्रामपंचायत अनुसूचित जाती मतदार संघातून सिंकदर तडवी विजयी झाले आहेत. तर इतर चार मतदार संघातही महाविकास आघाडीचे उमेदवार आघाडीवर आहेत.

पालघरमध्येही आघाडीचा झेंडा

पालघर कृषी उत्पन्न बाजार समितीच्या निवडणुकीत महाविकास आघाडीचा झेंडा रोवला गेला. 17 पैकी 17 जागा जिंकत महाविकास आघाडीने पालघर कृषी उत्पन्न बाजार समितीवर वर्चस्व प्राप्त केले आहे. पालघर बाजार समितीवर शिवसेना शिंदे गटाचा एकही उमेदवार निवडून आलेला नाही.

काल (शुक्रवारी) झालेल्या कृषी उत्पन्न बाजार समिती निवडणुकीत १५ जागा महाविकास आघाडीच्या बिनविरोध निवडून आल्या होत्या; तर व्यापारी गटाच्या दोन जागांसाठी चार उमेदवार निवडणुकीच्या रिंगणात होते. या निवडणुकीत दोन्ही उमेदवार महाविकास आघाडीचे निवडून आल्याने एकूण सदस्य संख्या १७ झाली. पालघर बाजार समितीवर शिवसेना शिंदे गटाचा एकही उमेदवार निवडून आलेला नाही.