Thorat Vs Vikhe : पारंपारिक राजकीय हाडवैर कायम, उमेदवारीच्या घोषणेआधीच थोरात-विखेंच्या मुलांमध्ये जुंपली

Ahilyanagar News : विधानसभा निवडणुकीच्या तारखांची घोषणा होताच, राजकीय संघर्ष तीव्र झाला आहे. राज्यातील प्रत्येक मतदार संघात राजकीय वाद उफाळला आहे. अहिल्यानगर जिल्ह्यातील संगमनेर विधानसभा मतदारसंघातून राजकीय वाद उफळाला आहे. बाळासाहेब थोरात आणि राधाकृष्ण विखे यांच्या पुढच्या पिढीत आता राजकीय संघर्ष उफाळून आला आहे.

काँग्रेसचे ज्येष्ठ नेते माजी मंत्री बाळासाहेब थोरात यांच्या कन्या जयश्री थोरात आणि भाजप (BJP) नेते मंत्री राधाकृष्ण विखे यांचे चिरंजीव माजी खासदार सुजय विखे यांच्या राजकीय संघर्ष पेटला आहे. या राजकीय संघर्ष विधानसभा निवडणुकीच्या मतदानाची तारीख जशी जवळ येईल, तसा तो अधिक होईल, असे दिसते.

संगमनेर विधानसभा मतदारसंघात भाजपचे माजी खासदार सुजय विखे चाचपणी करत आहेत. विखे पिता-पुत्रांनी गेल्या काही दिवसांपासून तसे संगमनेर मतदार संघात दौरे देखील वाढवले आहेत. यातून थोरात देखील अलर्ट झाले आहे. बाळासाहेब थोरात (Balasaheb Thorat) यांची कन्या जयश्री थोरात यांनी स्वतः कडे मतदार संघाची जबाबदारी घेतली आहे. त्यामुळे प्रत्येक राजकीय निर्णय जयश्री थोरात घेताना दिसत आहेत.

माजी खासदार सुजय विखे यांची संगमनेरमधून चाललेल्या चाचपणीला जयश्री थोरात यांनी शेलक्या शब्दात सुनावलं आहे. "मोठं आव्हान काही नाही. लोकशाहीची प्रक्रिया आहे. त्यांनी संगमनेरमधून खुशाल लढावं. त्यांचे स्वागत करू. पण ही थोरातसाहेबांची माणसं आहेत. थोरातसाहेबांचा परिवार आहे. खूप कष्टानं संगमनेर परिवार मोठा झालेला आहे. परंतु विखेंना येथून नाराजच होऊन जावे लागेल, अशी खात्री आहे", असा टोला जयश्री थोरात यांनी लगावला आहे.

जयश्री थोरात यांच्या या विधानावर माजी खासदार सुजय विखे यांनी देखील जोरदार प्रत्युत्तर दिलं आहे. "मंत्री राधाकृष्ण विखेसाहेबांवर महाराष्ट्राची जबाबदारी आहे. मंत्रालय किंवा कॅबिनेट बैठकांना जावे लागते. साहेब जेव्हा परत येतील, तेव्हा मी इतर भागात फिरायला सुरवात करेल. पण तिथं एवढी चांगली परिस्थिती असेल, मी तुल्यबळ उमेदवार नसेल, खरचं जर मला पाडण्यात संगमनेर विधानसभा मतदार संघात सोपं असेल, तर मग थोरातांचा सर्व परिवार फिल्डवर का आहे? एवढी चांगली परिस्थिती असेल तर एवढ्या लोकांनी फिल्डवर फिरण्याची आवश्यकता नाही", असा टोला सुजय विखेंनी लगावला आहे.