BJP Suresh Dhas son Sagar accident : भाजप आमदार धस यांच्या मुलाच्या वाहनाचा अपघात; धडकेत दुचाकीस्वाराचा मृत्यू

Ahilyanagar Pune road accident : भाजप आमदार सुरेश धस यांच्या मुलगा सागर याच्याकडील वाहनानं झालेल्या अपघातात दुचाकीस्वाराचा मृत्यू झाला आहे.

अहिल्यानगर-पुणे रस्त्यावर पारनेरच्या सुपा शिवारातील जातेगाव फाट्यावर हा अपघात रात्री अकरा वाजता झाला आहे. सुपा पोलिसांनी अपघाताची नोंद घेतली आहे.

पारनेरच्या जातेगाव घाट फाट्यावर हा अपघात झाला असून, यात नितीन शेळके (वय 34, पळवे खुर्द, ता. पारनेर) या दुचाकीस्वाराचा मृत्यू झाला आहे. आष्टी मतदारसंघाचे भाजपचे (BJP) आमदार सुरेश धस यांचा मुलगा सागर याच्याकडील चारचारी वाहनाने हा अपघात झाला.

अपघातावेळी वाहनात सागर सुरेश धस (Suresh Dhas) (रा. आष्टी, बीड) आणि सचिन दादासाहेब कोकणे (रा. तवलेवाडी, ता. आष्टी. जि.बीड) हे दोघे जण होते. दुचाकीस्वाराला मागून धडक बसल्याचे माहिती समोर येत आहे.

दुचाकीस्वार जातेगाव फाट्याकडून पारनेरकडे येत असताना, सागर धस याच्या वाहनाने मागून धडक जोराची धडक बसली. अपघात झाल्यानंतर त्याची माहिती सुपा पोलिसांना कळवण्यात आली. यानंतर जखमी दुचाकीस्वाराला उपचारासाठी रुग्णालयात दाखल करण्यात आले. परंतु दुचाकीस्वाराचा मृत्यू झाला होता.

सुपा पोलिसांनी सागर धस याच्याकडील वाहन ताब्यात घेतलं असून, अपघाताची नोंद घेतली आहे. वाहनातील सागर आणि सचिन या दोघांची पोलिसांनी वैद्यकीय तपासणी केली आहे. पारनेर तालुक्यातील सुपा पोलिस ठाण्यात अपघाताची नोंद घेण्यात आली आहे.