BJP Yeola Politics: भाजपचे दबावाचे राजकारण की अंतर्गत धुसफुस; एकीकडे भुजबळांशी चर्चा दुसरीकडे उमेदवारी अर्ज दाखल!

BJP Bhujbal Meeting: येवला नगरपालिका निवडणुकीत काल एक नवा ट्विस्ट निर्माण झाला. पक्षाच्या आनंद शिंदे यांनी थेट नगराध्यक्ष पदासाठी अर्ज दाखल केला. भाजपच्या अंतर्गत वादातून हे घडल्याचे बोलले जाते.

येवल्यात महायुती एकत्र येण्याची शक्यता धूसर झाली आहे. अन्न व नागरी पुरवठा मंत्री छगन भुजबळ आणि शिवसेना एकनाथ शिंदे पक्षाचे आमदार नरेंद्र दराडे यांच्यात तीव्र राजकीय वाद आहेत. त्यामुळे मंत्री भुजबळ यांनी स्वबळावर निवडणुकीची तयारी केली आहे.

भाजप कोणाबरोबर जाणार याचा निर्णय अद्याप झालेला नाही. मात्र वरिष्ठ नेत्यांकडून भाजप आणि हा मंत्री छगन भुजबळ यांच्याशी युती होण्याचे संकेत देण्यात आले आहेत. त्यातच भाजपचे आनंद शिंदे यांनी नगराध्यक्ष पदासाठी उमेदवारी अर्ज दाखल केला.

या घडामोडींमध्ये भारतीय जनता पक्षाने राजकीय लाभ उठवण्यासाठी प्रयत्न सुरू केले आहेत. माजी खासदार समीर भुजबळ यांच्याशी वाटाघाटी सुरूआहेत. त्यातच भाजपचा एक गट आमदार दराडे यांच्या संपर्कात असल्याचे बोलले जाते.

येवल्यात मंत्री भुजबळ यांनी यंदा अतिशय नियोजनपूर्वक नगरपालिका निवडणुकीची तयारी केली आहे. निवडणुकीत राजकीय उदासीनतेमुळे नगराध्यक्षपदाच्या निवडणुकीत पराभवाला सामोरे जावे लागले होते. त्यामुळे ती चूक भरून काढण्यासाठी भाजपशी जागा वाटपाची चर्चा सुरू आहे.

शहरात पाच ते सहा जागांवर भाजपचा प्रभाव आहे. त्या जागा भाजपला देऊन नगराध्यक्ष पद राष्ट्रवादी काँग्रेस अजित पवार पक्षाकडे ठेवावे. माजी खासदार समीर भुजबळ यांनी याबाबतचा प्रस्ताव भाजपच्या वरिष्ठ नेत्यांना दिला आहे. याविषयी त्यांनी आपली भूमिका देखील जाहीर केली.

या सर्व घडामोडी सुरू असतानाच भाजपमध्ये अंतर्गत धुसफूस असल्याच्या बातम्या बाहेर आल्या आहेत. त्यातूनच जिल्हा सरचिटणीस आनंद शिंदे यांनी नगराध्यक्ष पदासाठी उमेदवारी अर्ज दाखल केला. त्यामुळे पक्षाची पुढील भूमिका काय? हा चर्चेचा विषय आहे.

दरम्यान माजी खासदार समीर भुजबळ यांनी इलेक्टिव्ह मेरिट याला प्राधान्य दिले आहे. त्यासाठी सर्वेक्षण करण्यात आले आहे. इच्छुकांची चर्चा करून आज त्याबाबत पुढील निर्णय होण्याची शक्यता आहे. त्यामुळे नगरपालिका निवडणुकीत कोणाबरोबर जायचे याविषयी भाजपच्या नेत्यांचे एकमत होईल का? हा गोंधळ आहे.