AIMIM: भाजपच्या खासदारांनी धुळे शहराचा विकास रोखला?

धुळे : तीन वर्षांपासून आमदार फारुक शाह (MLA Faruk Shah) शहर विकासासाठी (Dhule city) प्रयत्नशील आहेत. त्यासाठी ते मुबलक निधी मिळवत आहेत. यात शहरातील रस्त्यांसाठी त्यांनी शासनाकडून (Government funds) ३० कोटींचा निधी मंजूर करून आणला. परंतु, भाजपच्या (BJP) खासदारांसह समर्थकांनी या निधीतील कामाला स्थगिती आणली आहे. अशा भूमिकेविरोधात एमआयएमच्या (AIMIM) महिला आघाडीने धिक्कार आंदोलन केले. (AIMIM agitation against BJP for City civic issues)

महापालिकेसह विविध पदांवर भाजपचे नेते सत्तेत आहेत. मात्र या सत्तेचा उपयोग ते राजकारणासाठी नागिरकांची अडचण कशी करता येईल यासाठी करतात. आमदार फारूक शाह यांनी विकासाच्या प्रश्नावर सातत्याने राज्य सरकारकडे पाठपुरावा केला. निधी आणला. मात्र या निधीतून विकासकामे न करता त्यावर स्थगिती मिळवण्याचे काम भाजप व त्यांचे खासदार करतात, असा आरोप यावेळी दिलेल्या निवेदनात करण्यात आला.

आंदोलक म्हणाले, अनेक आमदारांनी शहरवासीयांना विकासाचे गाजर दाखविले. परंतु, विकास केला नाही. मात्र, रस्ते, गटार, पाणी, रेशन मिळवून देणे, तसेच दिव्यांगांसह विधवा, परीतक्त्या व गरिबांना न्याय देण्याचे काम आमदार शाह करीत आहेत. शहराचा बट्याबोळ, देवपूरला खड्डेपूर करणाऱ्या मनपा प्रशासन व भाजपविरुद्ध अनेकांनी आमदारांना निवेदन दिले. या पार्श्वभूमीवर शहरातील संपूर्ण रस्ते होण्यासाठी आमदार शाह यांनी शासनाकडून ३० कोटींचा निधी मंजूर करून आणला. परंतु, खासदार डॉ. सुभाष भामरे व समर्थकांनी यातील कामाला स्थगिती आणली आहे. त्यामुळे शहराचा विकास रखडला.

एमआयएमच्या महिला शाखेच्या अध्यक्षा डॉ. दीपश्री नाईक, फातेमा अन्सारी, शकिला अन्सारी, शाहीन बी. इकबाल, फरजाना शाह, वालेमून रहेमान, अकीला बानू, रिझवान बानू, जुबेदा बानो शाह, निलोफर शाह, शबाना गुलाम मस्ताफा पिंजारी, शाहीन वकील अहमद, हमिदा पठाण, आसेफा सय्यद, मैमूना शेखअकिला पिंजारी, रेहाना पिंजारी, फैमिजा अन्सारी, जिल्हाध्यक्ष नासीर पठाण, शहराध्यक्ष मुक्तार अन्सारी आदी आंदोलकांनी भाजप विरोधात घोषणा देत तीव्र निषेध केला.

---