NCP vs BJP : भाजपला राष्ट्रवादी काँग्रेसचा पराभव करण्यासाठी 'राष्ट्रवादीच' लागते; जयंत पाटलांचा टोला

Jalgaon News : भारतीय जनता पक्षात अद्यापही विरोधकांना पराभव करण्याचे सामर्थ्य नाही. त्यांना राष्ट्रवादी काँग्रेसचा पराभव करण्यासाठी राष्ट्रवादीचाच माणूस शोधावा लागतो. त्या शिवाय त्यांच्याकडे पर्याय राहिलेला नाही, असा सणसणीत टोला राष्ट्रवादी काँग्रेसचे प्रदेशाध्यक्ष जयंत पाटील यांनी लगावला आहे.

राष्ट्रवादी काँग्रेसचे प्रदेशाध्यक्ष जयंत पाटील (Jayant Patil) जळगाव जिल्ह्याच्या दौऱ्यावर आहेत. आज त्यांनी जळगाव (Jalgaon) येथे आकाशवाणी चौकातील राष्ट्रवादी काँग्रेस (NCP) कार्यालयात बैठक आयोजित केली होती. यानंतर ते पत्रकारांशी बोलत होते. जळगाव जिल्हा बँक निवडणुकीत राष्ट्रवादी काँग्रेसचे संजय पवार यांना फोडून भाजप-शिवसेना शिंदे गटाने अध्यक्षपद बहाल केले. त्यावर बोलतांना जयंत पाटील म्हणाले, "भारतीय जनता पक्षाला स्वबळावर विरोधकांना पराभूत करण्याचे सामर्थ्य नाही. त्यामुळे राष्ट्रवादी काँग्रेसचा पराभव करण्यासाठी त्यांना राष्ट्रवादी काँग्रेसचा माणूस शोधावा लागतो. त्या शिवाय त्यांना कोणताही पर्याय नसतो."

शिंदे गटामुळे भाजपची किमंत घसरली

राज्यातील सद्याच्या परिस्थितीबाबत बोलतांना जयंत पाटील यांनी शिवसेनेसह (Shivsena) भाजपवर टीका केली. ते म्हणाले, "राज्यात शिवसेनेतून बाहेर पडलेल्या शिंदे गटाला कोणतीही किमंत राहिली नाही. मात्र त्यासोबत आता भारतीय जनता पक्षाची (BJP) किमंत कमी झाली आहे. असंगाशी संग केल्यावर काय होते ते आता भाजपला दिसून आले आहे. आगामी निवडणूकीत जनताही त्यांना दाखवून देईल."

एकनाथ शिंदे भाजपच्या प्रभावाखाली

जयंत पाटील यांनी मुख्यंमत्री एकनाथ शिंदे (Eknath Shinde) यांचाही समाचार घेतला. यासाठी त्यांनी मुख्यमंत्री व उपमुख्यमंत्र्यांच्या मुंबईतील पत्रकार परिषदेचे उदाहरण दिले. जयंत पाटील म्हणाले, "एकनाथ शिंदे किती प्रभावाखाली काम करीत आहेत, हे जनतेला दिसून आले आहे. राज्यात मुख्यमंत्री एकनाथ शिंदे असले तरी उपमुख्यमंत्री देवेंद्र फडणवीस हेच खऱ्या अर्थाने मुख्यमंत्रीपदाचे काम करीत आहेत हेच जनतेला दिसून आले आहे."

महाविकास आघाडी म्हणूनच लढणार

यावेळी पाटील यांनी राज्यातील आगामी निवडणुकांबाबत महाविकास आघाडीचे (MVA) धोरणही स्पष्ट केले. पाटील म्हणाले, "राज्यातील आगामी बाजार समिती तसेच पालिका, महापालिका, विधानसभा व लोकसभा निवडणुका काँग्रेस, राष्टवादी काँग्रेस, शिवसेना महाविकास आघाडी म्हणूनच लढणार आहोत."