Chhagan Bhujbal on Girish Mahajan Development Projects: स्थानिक कंत्राटदारांपाठोपाठ सत्ताधारी पक्षातील घटक पक्षांना देखील सिंहस्थ कुंभमेळा हा मोठी संधी वाटू लागली आहे. भाजपने जिल्ह्यातील मंत्र्यांना कुंभमेळ्यापासून जाणिवपूर्वक बाजूला ठेवल्याने त्याच्या प्रतिक्रिया आता उमटू लागल्या आहेत. त्यामुळे सिंहस्थ कुंभमेळा मंत्री गिरीश महाजन यांच्या राजकीय अडचणीत भर पडण्याची चिन्हे आहेत.
मुख्यमंत्री देवेंद्र फडणवीस आणि सिंहस्थ कुंभमेळा मंत्री गिरीश महाजन यांनी नाशिकच्या सिंहस्थ कुंभमेळा बाबत तीन बैठका घेतल्या. बैठकांना जिल्ह्यातील खासदारांसह मंत्री आणि सत्तेतील आमदारांनाही जाणीवपूर्वक अलिप्त ठेवण्यात आले होते. त्याच्या राजकीय प्रतिक्रिया आता उमटू लागल्या आहेत.
राज्याचे अन्न व नागरी पुरवठा मंत्री छगन भुजबळ यांनी जलसंपदा गिरीश महाजन यांना जळगाव जिल्ह्याकडेही लक्ष द्या, असा सूचक चिमटा घेतला होता. यानिमित्ताने मंत्री महाजन आणि भुजबळ यांच्यात चांगलाच राजकीय शाब्दिक वाद रंगला होता. आता भुजबळ यांनी त्यात नवीन अँगल आणला आहे.
अन्न व नागरी पुरवठा मंत्री भुजबळ यांनी आज नाशिकमध्ये सिंहस्थ कुंभमेळ्याची आढावा बैठक बोलावली आहे. बैठकीला जिल्हाधिकाऱ्यांसह प्रमुख यंत्रणांच्या अधिकाऱ्यांना हजर राहण्याच्या सूचना देण्यात आल्या आहेत. त्यामुळे मंत्र्यांच्या राजकारणात प्रशासकीय अधिकाऱ्यांची कोंडी होण्याची शक्यता आहे. त्याचा प्रशासनावरही परिणाम होईल.
नाशिकच्या पालकमंत्र्यांची नियुक्ती रखडली आहे. भाजपचे गिरीश महाजन त्यासाठी प्रमुख दावेदार मानले जातात. याबाबत मंत्री महाजन यांनीही थेट विधान करून आपली महत्त्वाकांक्षा व्यक्त केली होती. त्यामुळेच सिंहस्थ कुंभमेळ्याच्या माध्यमातून पालकमंत्री पदाचे राजकीय डावपेच खेळले जात आहेत.
नाशिक जिल्ह्यात अन्न व नागरी पुरवठा मंत्री भुजबळ, क्रीडामंत्री माणिकराव कोकाटे, अन्न व औषध प्रशासन मंत्री नरहरी झिरवाळ आणि शालेय शिक्षण मंत्री दादा भुसे असे चार मंत्री आहेत. असे असताना सिंहस्थ कुंभमेळ्याचा कार्यभार आणि पालकमंत्री पद जिल्हा बाहेरचे गिरीश महाजन यांना देण्याचे घाटत आहे.
त्यामुळेच शिवसेना शिंदे पक्ष आणि राष्ट्रवादी काँग्रेस भाजपवर दबाव आणण्याची कोणतीही संधी सोडण्यास तयार नाही. मुख्यमंत्री देवेंद्र फडणवीस यांनीही या राजकारणाला सामोरे जाण्याची तयारी ठेवली असल्याने, छगन भुजबळ यांसह महायुतीतील सहकारी मंत्र्यांचा किती प्रभाव पडतो हे आगामी काळात स्पष्ट होईल.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.