Chhagan Bhujbal : माझे लोक देखील सांगत होते तिकडे जाऊ, पण...भोंदूबाबा खरात प्रकरणावर छगन भुजबळ नेमकं काय म्हणाले?

Nashik Politics : नाशिकच्या सिन्नर तालुक्यातील भोंदूबाबा अशोक खरात याचे काळे कारनामे उघड झाल्याने राज्यभर या प्रकरणाची चर्चा होत आहे. खरातवर अत्याचाराचे गंभीर गुन्हे दाखल झाल्यानंतर आता याप्रकरणी तपास करण्यासाठी एसआयटी स्थापन करण्यात आली आहे. याप्रकरणी त्याची कसून चौकशी होत आहे.

दरम्यान अशातच या प्रकरणावर राष्ट्रवादीचे जेष्ठ नेते व अन्न व नागरी पुरवठा मंत्री छगन भुजबळ यांनी भाष्य केलं असून मोठा खुलासा केला आहे. माझे लोक देखील सांगत होते की, तिकडे जाऊन हात दाखवून अंकशास्त्र बघावं' पण, मी काही गेलो नाही. अंधश्रद्धेपासून दूर राहिले पाहिजे, हे माझं मत आहे. त्यामुळे मी गेलो नाही असं भुजबळांनी सांगितलं.

दरम्यान राष्ट्रवादीच्या नेत्या रुपाली चाकणकर यांचे भोंदूबाबा खरात सोबतचे फोटो आणि त्याची पाद्यपूजा करतानाचा व्हिडिओ समोर आला होते. त्यानंतर त्यांच्या राजीनाम्याची मागणी करण्यात येत होती. त्यानंतर मुख्यमंत्र्यांच्या हस्तक्षेपानंतर रुपाली चाकणकर यांनी राज्य महिला आयोगाच्या अध्यक्षपदाचा राजीनामा दिला आहे. त्यावर विचारले असता त्यावरही भुजबळांनी भाष्य केलं आहे.

भुजबळ म्हणाले, अशोक खरातकडे फार मोठ-मोठी मंडळी येत होती. रुपाली चाकणकर या पुण्याच्या आहे, त्यांना काय माहित? त्यांना सुद्धा तिकडे कोणीतरी नेलं असेल. पण राजकीय किंवा सामाजिक क्षेत्रात काम करणाऱ्यांनी काही बंधने पाळली पाहिजेत. आपण जे काही करतो त्याचा परिणाम सामान्य लोकांवर होतो. तसेच चाकणकर नेहमी तिथे जात असल्यामुळे त्यांना विश्वस्त केले असेल, असे भुजबळ म्हणाले.

दरम्यान चाकणकर यांनी महिला आयोगाच्या अध्यक्षपदाचा राजीनामा दिला असला तरी त्यांच्याकडे राष्ट्रवादी काँग्रेसचे महिला प्रदेशाध्यक्ष पद आहे. या पदावरुन देखील त्यांची गच्छंती केली जाणार का, असा सवाल केला असता भुजबळ म्हणाले, बाबत काय करायचे त्यासाठी पक्षश्रेष्ठी आहेत, पक्षाच्या अध्यक्षा सुनेत्रा पवार आहेत त्या निर्णय घेतील असं भुजबळ यांनी सांगितले. संपूर्ण चौकशी करून त्यावर निर्णय होतो, असे भुजबळांनी नमूद केलं.