Chhagan Bhujbal : एकनाथ शिंदेंना प्रत्युत्तर देणार? येवल्यात भुजबळांची सभा होणार.. वेळ तारीख ठरली

Nashik Politics : येवला नगरपालिका निवडणुकीचा प्रचार अंतिम टप्यात असून प्रचारात रंगत आली आहे. येथे शिवसेना शिंदे गट व राष्ट्रवादी शरदचंद्र पवार पक्षाकडून रुपेश दराडे तर राष्ट्रवादी अजित पवार पक्ष, भाजप, आरपीआय (आठवले गट) यांच्या युतीकडून राजेंद्र लोणारी हे नगराध्यक्षपदाचे उमेदवार आहे.

येवला नगरपालिकेत राज्याचे अन्न, नागरी पुरवठा व ग्राहक संरक्षण मंत्री छगन भुजबळांची प्रतिष्ठा पणाला लागली आहे. कारण येवला हा भुजबळांचा मतदारसंघ आहे. भुजबळ स्वत: आजारी असल्याने पुतणे समीर भुजबळ यांनी येवल्याची धुरा हाती घेतली आहे. तर दुसरीकडे भुजबळांना शह देण्यासाठी दराडे बंधूंनी शरद पवारांचे शिलेदार माणिकराव शिंदे यांना सोबत घेतलं आहे.

शुक्रवारी शिवसेनेचे उमेदवार रुपेश दराडे यांच्यासाठी स्वत:एकनाथ शिंदे यांनी येवल्यात सभा घेतली. उपमुख्यमंत्री एकनाथ शिंदे यांनी येवल्यात जाऊन थेट भुजबळ यांचे नाव न घेत त्यांना चॅलेंज केले. येवलेकरांनी विकासाची किती वाट पाहायची? असा सवाल त्यांनी उपस्थित केला. खरेतर येवल्यात नेहमी भुजबळांच्या विकास कामांची चर्चा असते. छगन भुजबळांमुळे देशभरात येवल्याची ओळख आहे. त्यामुळे येवला शहराच्या विकासाबाबत विशेष चर्चा असते. परंतु येवल्यात विकास न झाल्याचा दावा एकनाथ शिंदेंनी केला आहे.

त्यानंतर आता येवल्यात छगन भुजबळांची सुद्धा सभा घेण्याचे नियोजन समीर भुजबळांकडून करण्यात आले आहे. येवल्याच्या शनी पटांगणावर भव्य प्रचार सभा आयोजित करण्यात आली आहे. येत्या रविवारी, (दि.३०) नोव्हेंबर रोजी सायंकाळी ६ वाजता ही सभा होणार आहे. छगन भुजबळ हे आजारी असल्याने प्रत्यक्षात हजर राहणे शक्य नसल्याने दूरदृश्य प्रणालीद्वारे येवलेकरांशी संवाद साधणार आहेत.

त्यामुळे भुजबळांच्या या सभेकडे सगळ्यांचे लक्ष लागले आहे. भुजबळ आपल्या भाषणातून एकनाथ शिंदेंना प्रत्युत्तर देणार का हे पाहावे लागणार आहे. भुजबळांच्या गटाकडून उपमहाराष्ट्र केसरी राजेंद्र लोणारी यांच्यासह एकूण २६ नगरसेवक उमेदवार रिंगणात आहेत. येत्या २ डिसेंबर रोजी मतदान आहे. त्यापूर्वी रविवारी, दि.३० नोव्हेंबर २०२५ रोजी सायंकाळी ६ वाजता भव्य प्रचार सभेचे आयोजन करण्यात आले आहे. भुजबळ स्वत: मतदारांना संबोधित करणार आहे.

मंत्री छगन भुजबळ यांच्यावर नुकतीच शस्त्रक्रीया झाली आहे. डॉक्टरांच्या मार्गदर्शनाखाली ते मुंबईत उपचार घेत आहेत. येवला निवडणुकीसाठीचा वचननाम्याचे त्यांनी मुंबईतून अनावरण केले. आता प्रचार सभेत ते दूरदृश्य प्रणालीद्वारे सहभागी होणार आहेत. यानिमित्ताने या निवडणुकीत त्यांचा येवलेकरांशी थेट संवाद साधणार आहेत.