Nashik News : नाशिकमध्ये आगामी कुंभमेळ्याची तयारी सुरु असून त्यासाठी येणाऱ्या साधूंच्या निवासाकरिता तपोवनातील तब्बल १८०० झाडे तोडली जाणार आहे. कुंभमेळा मंत्री गिरीश महाजन यांचेही या वृक्षतोडीला समर्थन असल्याने गिरीश महाजन टीकेचे धनी बनले आहेत.
आतापर्यंत जेष्ठ अभिनेते सयाजी शिंदे, शिवसेना प्रमुख उद्धव ठाकरे, मनसे प्रमुख राज ठाकरे , तसेच आमदार रोहित पवार यांनी या प्रकरणात उडी घेतली असून वृक्षतोडीला विरोध केला आहे. या सगळ्यांनी गिरीश महाजन यांच्यावर टीका केली आहे. पर्यावरण प्रेमींनी तर महाजनांना लाकुडतोड्या असे संबोधले आहे.
वृक्षतोडीविरोधात पर्यावरणप्रेमी एकवटले असून त्यांनी तपोवनात मोठे आंदोलन सुरु केले आहे. अभिनेते सयाजी शिंदे यांनीही या आंदोलनाला पाठिंबा दिला आहे. त्यांनी गिरीश महाजनांसोबत दुश्मनी झाली तरी काही फरक पडत नाही असे म्हणत एकही झाड तोडू देणार नाही असे ठणकावले आहे.
त्यापार्श्वभूमीवर आमदार रोहित पवार यांनी देखील मंत्री गिरीश महाजन यांच्यावर निशाणा साधला आहे. रोहित पवार म्हणाले, भ्रष्टाचार हीच भक्ती आणि सत्ता हीच श्रद्धा असणाऱ्या सत्ताधाऱ्यांना तपोवनाचं महत्व काय कळणार? सत्ताधाऱ्यांना विशेषतः नाशिकच्या कारभाऱ्यांना केवळ आणि केवळ प्रॉफिटची भाषा कळते.
कुंभमेळ्याच्या नावाखाली जमीन मोकळी करायची आणि कुंभमेळा संपताच एखाद्या संस्थेच्या नावाने जमीन लीजवर घेऊन लाटायची हाच सत्ताधाऱ्यांचा खरा डाव असून तपोवनाची जमीन लाटण्यासाठीच एवढा अट्टहास सुरु असल्याचा आरोप रोहित पवारांनी केला आहे.
गुंडाचा वापर करून एखादं दुसरी नगरपालिका बिनविरोध केली म्हणजे प्रॉफिट कमवण्यासाठी त्याच पद्धतीने तपोवन खाली करता येईल हा कोणाचा समज असेल तर हा तथाकथित संकटमोचकांचा गोड गैरसमज आहे. असं रोहित पवारांनी म्हटलं आहे.
रोहित पवारांनी त्यांच्या अधिकृत एक्स अकाउंटवर एक व्हिडीओ पोस्ट केला आहे. हा व्हिडीओ पाहून श्रद्धेचा बाजार मांडून विकासाच्या नावाखाली शहर भकास करू पाहणाऱ्यांचे डोळे उघडतील ही अपेक्षा ! असे त्यांनी म्हटले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.