Chhagan Bhujbal Politics: समर्थकांचा दावा, जातनिहाय जनगणनेचे श्रेय छगन भुजबळ यांचेच!

Chhagan Bhujbal News: पंतप्रधान नरेंद्र मोदी यांनी बुधवारी जातनिहाय जनगणना करण्याची घोषणा केली. याबाबतचा निर्णय त्यांनी मंत्रिमंडळाच्या बैठकीत घेतला. राजकीय पक्ष आणि संघटनांत त्याच्या विविध प्रतिक्रिया देशभर उमटल्या आहेत.

पंतप्रधान नरेंद्र मोदी यांनी देशात जातनिहाय जनगणना करण्याची घोषणा केली. त्याचे अखिल भारतीय समता परिषद अर्थात माजी उपमुख्यमंत्री छगन भुजबळ समर्थकांकडून जोरदार स्वागत करण्यात आले. शहरातील महात्मा फुले आणि सावित्रीबाई फुले पुतळ्याजवळ जमून समर्थकांनी जोरदार घोषणा दिल्या.

राज्यात ओबीसी आरक्षणातील समस्या आणि या संदर्भात सुरू असलेले न्यायालयीन निवाडे हा गंभीर प्यायचा आहे यासंदर्भात सर्वोच्च न्यायालयात मराठा आरक्षण आणि ओबीसी आरक्षण या संदर्भात इम्पेरीकल डेटा देण्यात यापूर्वी केंद्र शासनाने असमर्थता व्यक्त केली होती. या पार्श्वभूमीवर जातनिहाय जनगणनेचा निर्णय दिलासा देणारा मानला जातो.

अखिल भारतीय समता परिषदेच्या माध्यमातून छगन भुजबळ यांसह विविध नेत्यांनी ओबीसींच्या प्रश्नांवर आणि त्यांच्या अधिकाऱ्यांबाबत सातत्याने संघर्ष केला आहे. जातनिहाय जनगणना व्हावी ही त्यांचीच मागणी होती. त्यासाठी प्रदीर्घकाळ त्यांनी लढा दिला, असे समता परिषदेचे सरचिटणीस दिलीप खैरे यांनी सांगितले.

राज्यातील आणि देशातील ओबीसी समाज संघटित व्हावा, यासाठी १९९२ मध्ये अखिल भारतीय समता परिषदेच्या माध्यमातून प्रयत्न सुरू झाले. त्यासाठी देशभर मेळावे घेऊन या समाज घटकाला जागृत करण्याचा प्रयत्न भुजबळ यांनी केला. १९९२ मध्येच जातनिहाय जनगणनेच्या मागणीला सुरुवात झाली होती. या लढ्याला आता यश आले आहे असा दावाही, श्री खैरे यांनी केला.

यावेळी श्री खैरे यांच्या नेतृत्वाखाली मुंबई नाका येथील महात्मा फुले स्मारकात ढोल ताशे वाजवत जल्लोष झाला. यावेळी कार्यकर्त्यांनी नागरिकांना पेढे वाटले. केंद्र शासनाच्या या निर्णयाचे स्वागत करतानाच त्यांनी केंद्र सरकारचे आभार मानले.

समता परि।देचे पदाधिकारी बाळासाहेब कर्डक, नानासाहेब महाले, समाधान जेजुरकर, शहराध्यक्ष कविता कर्डक, अंबादास खैरे, पूजा आहेर, अशा भऺदूरे, अमोल नाईक, शशी हिरवे यांसह समता परिषदेचे पदाधिकारी आणि श्री भुजबळ यांचे समर्थक मोठ्या संख्येने यावेळी सहभागी झाले होते.

-------