Raj Thackrey Politics: भाजप आमदार देवयानी फरांदे यांनी घेतली राज ठाकरेंची भेट!

Devyani Pharande News: महाराष्ट्र नवनिर्माण सेनेचे प्रमुख राज ठाकरे यांचे आज नाशिकला आगमन झाले. यावेळी पक्षाच्या पदाधिकाऱ्यांनी त्यांचे स्वागत केले. यावेळी ठाकरे यांनी पत्रकारांची संवाद साधने टाळले.

भारतीय जनता पक्षाचे आमदार देवयानी फरांदे यांनी यावेळी राज ठाकरे यांची भेट घेतली. विधानसभा निवडणुकीनंतर ठाकरे पहिल्यांदाच नाशिकला आले होते. विधानसभा निवडणुकीत आमदार फरांदे यांच्या मतदारसंघातून मनसेच्या उमेदवाराने उमेदवारी मागे घेतली होती.

शहरात २०२७ मध्ये सिंहस्थ कुंभमेळा होत आहे. आगामी काळात नाशिक शहरात महापालिकेच्या निवडणुका अपेक्षित आहेत. त्या दृष्टीने राजकीय वातावरण ढवळून निघाले आहे. या पार्श्वभूमीवर आमदार देवयानी फरांदे यांनी राज ठाकरे यांचे स्वागत केले. ही सदीच्छा भेट असल्याचे त्यांनी सांगितले.

महापालिका निवडणुकीच्या दृष्टीने विविध पक्षांमध्ये जोरदार तयारी सुरू आहे. अनेक नगरसेवक पदासाठी इच्छुक असलेल्या कार्यकर्ते, नेत्यांचे इन्कमिंग आणि आउटगोइंग सुरू आहे. विशेषत: माजी नगरसेवक आणि महापालिकेचे इच्छुक उमेदवार आपल्या प्रभागात मोर्चेबांधणीत व्यस्त आहेत.

वरिष्ठ नेत्यांकडून नाशिक शहरातील राजकीय स्थितीबाबत आढावा घेतला जात आहे. त्या दृष्टीने आमदार फरांदे यांच्याशी ठाकरे यांची चर्चा झाल्याचे त्यांनी सांगितले. राज ठाकरे यांनी आगामी सिंहस्थ कुंभमेळा तसेच अन्य उपक्रमांबाबत माहिती दिल्याचेही त्या म्हणाल्या.

आगामी महापालिका निवडणुकीच्या पार्श्वभूमीवर राज ठाकरे यांचा तीन दिवसांचा दौरा आहे. या दौऱ्यात आज त्यांनी शहराच्या पदाधिकाऱ्यांची चर्चा केली. ही चर्चा बंद दारावर झाल्याने त्यात नेमके काय घडले याबाबत माहिती उपलब्ध होऊ शकली नाही.

मनसे प्रमुख ठाकरे यांनी गेले काही महिन्यात भारतीय जनता पक्षाशी सलगी केली आहे. भारतीय जनता पक्षाकडून देखील मनसेला महापालिका निवडणुकीत बरोबर घेण्याची तयारी असल्याचे संकेत देण्यात आले आहेत. आगामी महापालिका निवडणुकीत नाशिक मध्ये मनसे आणि महायुती एकत्र निवडणुकीला सामोरे जाणार का, याची चर्चा या निमित्ताने पुन्हा एकदा सुरू झाली आहे.

------