Devendra fadnavis Politics: आम्ही रोजच चुकतो, आम्हाला माफ करा! कुंभमेळ्यात राहणार नाही त्रुटी, साधूंना देवाभाऊंची खात्री

Kumbhmela News: मुख्यमंत्री देवेंद्र फडणवीस यांनी आज सहा हजार कोटींच्या कामांचे भूमिपूजन केले. या कुंभमेळ्यासाठी पंचवीस हजार कोटी रुपये खर्च झाले तरी चालतील, मात्र कुंभमेळ्याचा गाजा वाजा देशभर झाला पाहिजे, असा निर्धार त्यांनी व्यक्त केला.

मुख्यमंत्री देवेंद्र फडणवीस यांनी आज आगामी कुंभमेळ्याविषयी शासनाचे धोरण स्पष्ट केले. नाशिकच्या कुंभमेळ्याची तुलना प्रयागराज येथील कुंभमेळ्याशी केली. त्याचबरोबर गतकुंभमेळ्यातील कामांचाही आवर्जून उल्लेख केला.

मी आणि उपमुख्यमंत्री एकनाथ शिंदे यांनी नाशिकचा कुंभमेळा उत्तम करण्याचा निश्चय केला आहे. त्यासाठी निधी कमी पडू द्यायचा नाही हे ठरले आहे. नवी कामे करताना नाशिकच्या परंपरा आणि धार्मिक ऐतिहासिक स्थिती बदलणार नाही, याची दक्षता घेतली जाईल.

साधारणता पंचवीस हजार कोटी रुपयांची कामे कुंभमेळ्यांच्या निमित्ताने करण्यात येतील. त्यातील वीस हजार कोटींच्या कामांना मंजुरी मिळाली आहे. यामध्ये नाशिक शहराच्या सभोवती उत्तम दर्जाचे रिंग रोड करण्यात येणार आहेत. या रस्त्यांमुळे कुंभमेळ्यानंतर देखील नाशिक आणि त्र्यंबकेश्वरच्या वैभवात भर पडेल.

सिंहस्थ कुंभमेळ्यांच्या नियोजनामध्ये स्थानिक लोकप्रतिनिधींचा सहयोग असेल. येथील नागरिकांनी देखील आम्हाला मोठी मदत केली आहे. यानिमित्ताने नाशिक शहरात वीस हजार कोटीहून अधिक निधीचा विनियोग होईल.

नाशिक आणि त्र्यंबकेश्वर या दोन्ही ठिकाणी पाचशे एकर जागा कुंभमेळ्यासाठी उपलब्ध केली जाणार आहे. जगातील सर्वात मोठा कुंभमेळा प्रयागराजला झाला. नाशिक मध्ये देखील कुंभमेळ्याच्या पावित्र्यात आणि उत्सवात कमतरता राहणार नाही, यासाठी यंत्रणा डोळ्यात तेल घालून काम करीत आहे.

नाशिकला २ ऑगस्ट २०२७ ला पहिले अमृत स्नान होईल. प्रयागराज येथे झालेल्या कुंभमेळ्यात पंतप्रधान नरेंद्र मोदी यांच्या नेतृत्वाखाली सांस्कृतिक जागराची मोहीम झाली. नाशिकला देखील ती मोहीम पाहायला मिळेल.

आज झालेल्या कार्यक्रमाला उपमुख्यमंत्री एकनाथ शिंदे, कुंभमेळा मंत्री गिरीश महाजन, कुंभमेळा प्रमुख महसूल आयुक्त प्रवीण गेडाम, कुंभमेळा आयुक्त सिंग आणि विविध लोकप्रतिनिधी आदी उपस्थित होते. नगरपालिका निवडणुकीची आचारसंहीता असल्याने हा कार्यक्रम नाशिकला झाला.

-------