Devyani Phrande Politics: आमदार देवयानी फरांदे यांचा आरोप, कुंभमेळ्याच्या कोटींच्या निविदांमुळे विरोधकांचा नाशिककडे ओढा!

BJP Vs NCP News: गेल्या आठवड्यात शिवसेना आणि मनसेने जोरदार शक्ती प्रदर्शन केले. त्या पाठोपाठ राष्ट्रवादी काँग्रेस शरदचंद्र पवार पक्षानेही नाशिकला मोर्चा काढला. भाजपला टारगेट करण्यासाठी विरोधकांनी जोर लावला आहे.

विरोधी पक्षांच्या सक्रियतेवर भाजपच्या आमदार देवयानी फरांदे यांनी प्रश्नचिन्ह निर्माण केले आहे. विरोधी पक्ष आगामी महापालिका आणि जिल्हा परिषद निवडणुकांमुळे सक्रिय झाला आहे. जनतेशी कोणतीही बांधिलकी राहिली नसल्याने ते धावपळ करीत आहेत.

नाशिकमध्ये आगामी सिंहस्थ कुंभमेळ्याच्या दृष्टीने मुख्यमंत्री देवेंद्र फडणवीस यांनी अनेक उपक्रम हाती घेतले आहेत. पाच ते सहा हजार कोटींच्या विकास कामांच्या निविदा काढण्यात येणार आहे. या निविदांमुळेच विरोधी पक्ष नाशिककडे आकर्षित झाले आहेत.

शिवसेना, मनसे अथवा अन्य विरोधी पक्षांचा विचार केल्यास हे नेते पर्यटनासाठी नाशिकला येतात, असा टोला आमदार फरांदे यांनी लगावला आहे. या पक्षांची जनतेशी नाळ तुटलेली आहे. त्यांच्यावर जनतेचा विश्वास राहिलेला नाही.

भारतीय जनता पक्ष हा लोकांच्या प्रश्नांवर आणि त्यांच्याशी संपर्क असलेला पक्ष आहे. निवडणुका नसल्या तरीही भाजप लोकांमध्ये जाऊन काम करत असतो. त्यामुळे भाजपला असे उपक्रम करण्याची आवश्यकता नाही.

राज्यातील सरकारने नाशिक शहरासाठी मोठा विकासाचा प्लान केला आहे. सिंहस्थ कुंभमेळ्याच्या निमित्ताने शहरात अनेक विकास कामे होतील. त्यांवरच्या खड्ड्यांचा प्रश्न देखील दिवाळीनंतर संपुष्टात येईल. त्यासाठीची तयारी प्रशासनाने केली आहे.

मुख्यमंत्री देवेंद्र फडणवीस हे चांगले काम करीत आहेत. हा विश्वास लोकांमध्ये आहे. त्यामुळेच धास्तावलेले विरोधी पक्ष नाशिकमध्ये मोर्चे काढून वातावरण निर्मितीच प्रयत्न करीत आहेत. त्याचा काहीही उपयोग होणार नाही असा दावा आमदार फरांदे यांनी केला.

महापालिका निवडणुकीच्या पार्श्वभूमीवर शिवसेना आणि मनसेने जोरदार शक्ती प्रदर्शन केले होते. नंतर राष्ट्रवादी काँग्रेस शरदचंद्र पवार देखील सक्रिय झाला आहे. मात्र भाजपच्या नेत्या परांदे यांनी या सर्वच प्रयत्नांवर प्रश्नचिन्ह निर्माण केले आहे. त्यामुळे भाजप आणि विरोधकांमध्ये आगामी काळात राजकीय संघर्ष पहायला मिळेल, याचे संकेत आहेत.

-------