Anup Aggarwal News: निवडणूक आयोगाने तयार केलेली मतदार यादी हा चिंतेचा विषय आहे. सर्वच राजकीय पक्ष त्याबाबत निवडणूक आयोगावर संतप्त आहेत. त्याची प्रचिती राज्यभर येऊ लागली आहे.
मतदार याद्या आणि त्यातील गोंधळ याबाबत लोकसभेतील विरोधी पक्ष नेते राहुल गांधी यांनी सर्वप्रथम आवाज उठवला. राज्यात शिवसेना उद्धव ठाकरे पक्षाने त्यावर तक्रार केली. उद्धव ठाकरे आणि राज ठाकरे दोघांनीही निवडणूक आयोगाला फैलावर घेतले.
सुरुवातीला विरोधी पक्षांसाठी चिंतेचा विषय बनला होता. आता सत्ताधारी पक्ष ही निवडणूक आयोगावर संतापले आहेत. नाशिक मध्ये शिवसेना एकनाथ शिंदे पक्षाने या विरोधात आवाज उठवला. आता धुळे महापालिकेत मतदार यादीत प्रचंड गोंधळ आणि त्रुटी असल्याचा संताप भाजपने व्यक्त केला आहे.
सत्ताधारी भाजप निवडणूक आयोगाच्या या कार्यपद्धतीवर संतापला आहे. याबाबत कार्यकर्त्यांनी मतदार यादीचा बारीक अभ्यास करावा. त्यातील त्रुटी दूर करण्यासाठी प्रशासकीय स्तरावर पाठपुरावा करावा, अशा सूचना धुळे भाजपचे नेते आमदार अनुप अग्रवाल यांनी दिल्या.
धुळे महापालिकेच्या निवडणुकीसाठी बैठक झाली. त्यावेळी भाजपच्या कार्यकर्त्यांना आमदार अग्रवाल यांनी चांगलेच फैलावर घेतले. नेत्यांच्या शिफारशी आणून उमेदवारी मिळणार नाही. नेत्यांच्या पुढे मागे केल्याने उमेदवारी मिळेल या भ्रमातून बाहेर पडावे, असा दम त्यांनी इच्छुकांना भरला.
आगामी धुळे महापालिकेची निवडणूक भाजप कार्यकर्त्यांच्या परिश्रमातून जिंकणार आहे. राज्यात आणि शहरात आता विरोधक शिल्लक राहिलेले नाही. त्यामुळे जनतेचा फक्त भाजपवर विश्वास आहे. त्याचा लाभ कार्यकर्त्यांनी घ्यावा असे आवाहन त्यांनी केले.
भाजपने अल्पसंख्यांक मतदारांची चांगलीच धास्ती घेतली आहे. यावेळी झालेल्या चर्चेत नेत्यांनी मुस्लिम मतदारांच्या संख्येवर प्रश्नचिन्ह उपस्थित केले. मुस्लिम मतदारांनी यापूर्वी केलेल्या मतदानामुळे भाजप धास्तावल्याचे स्पष्ट झाले.
प्रभाग ११ मध्ये यापूर्वीच्या निवडणुकीत सहा हजार मुस्लिम मतदार होते. ते आता साडे आठ हजार झाले आहेत. प्रभाग १२ मध्ये सहा हजार मुस्लिम मतदार आहेत. प्रभाग १३ मध्ये आठ हजार हिंदू मतदार होते ती संख्या आता चार हजार झाली आहे. याबाबत आमदार अग्रवाल यांनी संताप व्यक्त केला.
आमदार अग्रवाल यांच्या उपस्थितीत महापालिका निवडणुकीच्या तयारीची बैठक झाली. यावेळी जिल्हा अध्यक्ष गजेंद्र अंबळकर, माजी आमदार राजवर्धन कदमबांडे, डॉ सुशील महाजन, माजी महापौर प्रदीप कर्पे अभिनेते उपस्थित होते. यावेळी निवडणूक जिंकण्याचा निर्धार करून कार्यकर्त्यांनी कामाला लागावे असे नेत्यांनी बजावले.
-----
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.