Diesel petrol shortage : डिझेलसाठी शेतकऱ्यांच्या रांगा; देवाभाऊंनी मात्र व्यक्त केली वेगळीच शंका!

Devendra Fadnavis News: अमेरिका इराण युद्धाच्या पार्श्वभूमीवर अचानक पेट्रोल पंपांवर तुटवडा निर्माण झाला आहे. अनेक ठिकाणी शेतकरी रात्रभर पंपांवर मुक्काम करीत आहेत. डिझेल मिळत नसल्याने शेतकरी वैतागला आहे. गेल्या आठवड्यांपासून अचानक पेट्रोल आणि डिझेलची टंचाई निर्माण झाली आहे. ग्रामीण भागात परिस्थिती हाताबाहेर गेली आहे.

खरीप पूर्व मशागतीची कामे सध्या राज्यभर सुरू आहेत. पावसाचे आगमन केव्हाही होऊ शकते. त्यामुळे शेतकऱ्यांना ट्रॅक्टर आणि यंत्रांना डिझेलची तीव्र मागणी आहे. संदर्भात टंचाईमुळे शेतकऱ्यांनी शासनाविरुद्ध संताप व्यक्त केला आहे.

त्याच्या राजकीय प्रतिक्रिया राज्यभर उमटू लागल्या आहेत. राज्याचे अन्न व पुरवठा मंत्री छगन भुजबळ यांनी टंचाई नसल्याचा दावा केला. प्रत्यक्षात जळगाव धुळे यांसह मंत्री भुजबळ यांच्या मतदारसंघातच डिझेलसाठी पंपांवर शेतकरी तळ ठोकून असल्याचे चित्र आहे.

या पार्श्वभूमीवर आज मुख्यमंत्री देवेंद्र फडणवीस यांनीही या प्रकरणाची गंभीर दखल घेतली आहे. राज्यात अनेक ठिकाणी टंचाई असल्याच्या तक्रारी आल्याचे त्यांनी मान्य केले. या संदर्भात तातडीने उपाययोजना करून प्रश्न सोडविण्याचे आदेश त्यांनी दिले. मुख्यमंत्री फडणवीस यांनी या संदर्भात वेगळीच शंका व्यक्त केली आहे. दरवर्षी सामान्यपणे डिझेल आणि पेट्रोलची किती मागणी असते याची माहिती आपल्याकडे आहे. त्या तुलनेत 20 ते 30 टक्के अधिक मागणी होत असल्याचे आढळले ते त्यांनी सांगितले.

शेतकऱ्यांच्या नावाखाली कोणी अनधिकृतपणे साठेबाजी तर करीत नाही ना? अशी शंका त्यांनी व्यक्त केली. या पार्श्वभूमीवर विभागीय महसूल आयुक्त यांना चौकशीचे आदेश दिले आहेत. कोणीही शेतकऱ्यांच्या नावाखाली पेट्रोल डिझेल खरेदी करून साठेबाजी करीत असल्यास कारवाई करण्यात येईल, असे मुख्यमंत्र्यांनी स्पष्ट केले.