Dr Vijaykumar Gavit Politics: विजयकुमार गावित यांचा नंदुरबारमध्ये स्वबळाचा हट्ट भाजप श्रेष्ठी मान्य करतील का?

Nandurbar ZP Election News: नंदुरबार जिल्ह्यात जिल्हा परिषद आणि महापालिकेच्या निवडणुकीची राजकीय रंगत चांगलीच वाढली आहे. माजी मंत्री डॉ विजयकुमार गावित यांना जिल्ह्याच्या राजकारणावरील आपले वर्चस्व पुन्हा निर्माण करण्याची इर्षा निर्माण झाली आहे. त्यामुळे महाविकास आघाडीतील नेत्यांमध्ये दुरावा वाढण्याची शक्यता आहे.

आगामी जिल्हा परिषद निवडणुकीची तयारी भाजपसाठी डॉ विजयकुमार गावित यांनी सुरू केली आहे. मात्र त्यांचे राजकारण स्वकेंद्रित असल्याने भाजपच्या अन्य नेत्यांमध्ये असुरक्षिततेची भावना आहे. त्याचा फायदा महायुतीचा सहकारी पक्ष शिवसेना शिंदे गट घेण्याची चिन्हे आहेत.

डॉ. गावित यांना आमदार चंद्रकांत रघुवंशी यांचा प्रखर विरोध आहे. गेल्या काही महिन्यात आमदार रघुवंशी यांनी अन्य पक्षांत फूट पाडून आपल्या पक्षात अनेक प्रवेश घडवून आणले आहेत. नंदुरबार शहर शिवसेना एकनाथ शिंदे पक्षाचे आमदार चंद्रकांत रघुवंशी यांच्या प्रभावाखाली आहे. त्यामुळे रघुवंशी यांची देखील स्वबळावर निवडणुकीची मानसिकता आहे.

महायुतीतील या वादाचा फायदा काँग्रेस पक्षाला किती मिळतो हे मात्र सांगता येत नाही. काँग्रेस पक्ष गेल्या निवडणुकीपेक्षा यावेळी अधिक कमकुवत झाल्याचे चित्र आहे. निवडणुकीच्या तोंडावर माजी मंत्री पद्माकर वळवी स्वगृही काँग्रेस पक्षात परतले आहेत. त्याचा कसा फायदा काँग्रेस पक्ष करून घेईल याची उत्सुकता आहे.

नंदुरबार जिल्हा परिषदेत ५६ सदस्य आहेत. गेल्या निवडणुकीत काँग्रेसचे सर्वाधिक २४ आणि आमदार चंद्रकांत रघुवंशी समर्थक ९ सदस्य निवडून आले होते. त्यांनी युती करून जिल्हा परिषदेवर आपला झेंडा फडकवला. डॉ गावित अर्थात भाजपचे २१ सदस्य होते. काँग्रेसच्या सात सदस्यांना फोडून त्यांनी कन्या सुप्रिया गावित हिला जिल्हा परिषदेचे अध्यक्ष केले होते.

नंदुरबार जिल्हा आणि अन्य संस्थांच्या राजकारणावर माजी मंत्री डॉ विजयकुमार गावित यांनी गेली दहा वर्षे एक हाती वर्चस्व निर्माण केले होते. भारतीय जनता पक्षाने देखील त्यांना पूर्ण मोकळीक दिली होती. यातून भाजपमध्येच गावित यांना मोठा विरोध सुरू झाला होता.

स्वतः गावित पालकमंत्री, एक मुलगी डॉ हिना गावित खासदार, दुसरी मुलगी जिल्हा परिषद अध्यक्ष, भाऊ आमदार, इतर कुटुंबीय पंचायत समितीच्या पदावर अशी स्थिती होती. नंदुरबारची सारी सूत्रे डॉ गावित यांच्या घरातूनच हलत होती. त्यामुळे त्यांना सहकारी पक्षातूनच विरोधक निर्माण झाले.

लोकसभा निवडणुकीत डॉ गावित यांच्या कन्या डॉ हिना गावित पराभूत झाल्या. त्याची परतफेड त्यांनी काँग्रेस नेते के सी पाडवी यांच्या मतदारसंघात अपक्ष औउमेदवारी करून पाडवी यांच्या पराभवाने केली. यामध्ये शिवसेना शिंदे पक्षाचे आमश्या पाडवी यांना आमदारकीची लॉटरी लागली. त्याचा तोटा काँग्रेस आणि डॉ गावित दोघांनाही येत्या जिल्हा परिषद निवडणुकीत पाहायला मिळेल.

या पार्श्वभूमीवर महायुतीचे घटक भाजप आणि शिवसेना एकनाथ शिंदे यांच्यात मतभेदाची दरी वाढली आहे. त्यामुळेच डॉ गावित यांचा स्वबळावर जिल्हा परिषद निवडणुकीचा हट्ट पक्षश्रेष्ठी मान्य करतील का? याची उत्सुकता आहे. तसे झाल्यास काँग्रेस त्याचा किती लाभ घेईल, यावर कार्यकर्ते आडाखे बांधण्यात व्यस्त आहेत.

------