Shinde Gat : ठाकरे गटाला घेरणार! मुंबई, ठाण्याच्या धर्तीवर शिंदे गटाचा नाशिकमध्ये बिग प्लॅन

अरविंद जाधव-

Maharashtra Politics Latest News : उद्धव बाळासाहेब ठाकरे शिवसेना आणि शिंदे गट शिवसेना हे आपल्यापरीने कार्यकर्त्यांना जमवणे आणि आहे त्या कार्यकर्त्यांची तटबंदी करणे याकडे लक्ष ठेवून आहेत. या पार्श्वभूमीवर शिवसेनेने (शिंदे गट) 31 प्रभागांत 122 शाखांचा विस्तार करण्याचे काम सुरू केले आहे. या महिन्याच्या अखेरीस पक्षाचा मोठ्या प्रमाणावर विस्तार झालेला असेल, असे जिल्हाप्रमुख अजय बोरस्ते यांनी सांगितले.

शिवसेना पक्षाची ताकदच संघटन असून त्याचा मार्ग शिवसेनेच्या शाखांमधून जातो. फक्त शाखांचे फलक लावणे हा आमचा उद्देश नाही. स्वर्गीय बाळासाहेब ठाकरे यांनी शाखांची ताकद वाढवली. मुंबई आणि ठाण्यामध्ये आमदारही शाखांवरच थांबतात, हेच चित्र नाशिकमध्ये निर्माण होत असल्याचे बोरस्ते यांनी स्पष्ट केले.

वॉर्ड तेथे शाखा या पद्धतीने शाखा कार्यरत होतील. सेवा, संस्कृती आणि सुरक्षा या त्रिसूत्रीवर शाखांचे काम चालेल. शाखाप्रमुख आणि उपप्रमुखांसह ११ सदस्यांची प्रत्येक शाखेत नियुक्ती करण्यात येत आहे. ही शाखा त्या वॉर्डसाठी नगरसेवकाइतकीच महत्त्वाची ठरेल, याकडे आमचे लक्ष असल्याचे बोरस्ते म्हणाले. जानेवारी महिन्याच्या अखेरपर्यंत सर्व शाखा कार्यान्वित होतील.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

दरम्यान, शिंदे आणि ठाकरे गटातील फुटीचा परिणाम राज्यात जसा झाला तसा तो नाशिक शहरामध्ये तेवढा झाला नाही. वर्षानुवर्षे उद्धव ठाकरे यांच्यासाठी कार्यरत असलेला मोठा गट आजही कायम आहे. संजय राऊत, सुधाकर बडगुजर यांच्यामार्फत ठाकरे गटाची शहरातील पकड मजबूत ठेवण्यात तूर्तास पक्षाला यश मिळाले आहे.

ठाकरे गटाचे महानगरप्रमुख सुधाकर बडगुजर यांना मागील महिन्यात कायदेशीर प्रक्रियेला समोरे जावे लागले. या प्रकरणांची चौकशी सध्या सुरू आहे. दुसरीकडे शिंदे गटाने मात्र उचल खाल्ली असून शाखांच्या विस्ताराबरोबर जास्तीत जास्त शिवसैनिकांना सोबत घेण्याचा प्रयत्न स्थानिक नेत्यांकडून सुरू आहे.