Girish Mahajan Politics: गिरीश महाजन यांनी संजय राऊत यांना सुनावले... प्रमोद महाजन यांना अपेक्षित यश आम्ही मिळवूच!

Girish Mahajan News: शिवसेना नेते संजय राऊत यांनी गिरीश महाजन यांच्यावर टीका केली होती. त्याला जलसंपदा मंत्री महाजन यांनी उत्तर दिले आहे. संजय राऊत यांनी कितीही प्रयत्न केले तरी आगामी निवडणुका भाजप जिंकेल, असे महाजन म्हणाले.

खासदार संजय राऊत यांनी मंत्री गिरीश महाजन हे प्रमोद महाजन नव्हेत. ते प्रमोद महाजन होऊ शकत नाहीत, अशी टीका केली होती. नाशिक महापालिकेच्या आगामी निवडणुकीच्या पार्श्वभूमीवर गिरीश महाजन यांना शिवसेना उद्धव ठाकरे पक्षाचे नेते राऊत यांनी उत्तर दिले होते.

या पार्श्वभूमीवर जलसंपदा मंत्री गिरीश महाजन यांनीही खासदार राऊत यांच्या टीकेला परतफेड केली आहे. ते म्हणाले, मी प्रमोद महाजन नाही, याची मला जाणीव आहे. आम्ही प्रमोद महाजन होऊ शकत नाही, मात्र प्रमोद महाजन यांना अपेक्षित असलेले यश भाजपला मिळावे यासाठी आम्ही सर्व प्रयत्नशील आहोत.

देशभरात भारतीय जनता पक्षाला अनुकूल असे वातावरण निर्माण होते आहे. देशातील मतदार भाजपसोबत आहे. गेल्या विविध निवडणुकांमध्ये हे दिसून आले आहे. विरोधी पक्ष मात्र अजूनही त्याचा बोध घेण्यास तयार नाही. आपला पराभव लपविण्यासाठी विरोधक खोटे आरोप करण्यात व्यस्त झाले आहेत.

देशभरात भगवामय वातावरण तयार झाले आहे. त्यामुळे आगामी काळातील स्थानिक स्वराज्य संस्थांच्या निवडणुकीत न भूतो न भविष्यती अशी स्थिती सर्व नागरिक अनुभवतील. जिल्हा परिषद, महापालिका आणि अन्य निवडणुकांमध्ये विरोधकांनी कितीही प्रयत्न केला तरीही त्यांना सत्ता मिळण्याची शक्यता नाही.

विरोधकांनी राजकारणाचे कितीही थर लावले, राजकीय द्वेषाची कितीही उंची गाठली तरीही येणाऱ्या निवडणुकांतील दहीहंडी आम्हीच फोडणार असा विश्वास मंत्री महाजन यांनी व्यक्त केला. धुळे महापालिकेच्या निवडणुकीच्या पार्श्वभूमीवर प्रतिस्पर्धी पक्षातील अनेक नेते भाजपमध्ये येत आहे. त्यामुळे धुळे महापालिकेत ५० हून अधिक जागा भाजपला मिळतील असा दावा त्यांनी केला.

--------