Dada Bhuse Politics : भाजपच्या संकटमोचकांवर शिवसेनेचे 'दादा' ठरले वरचढ, कुंभमेळा नगरीतूनच केलं हद्दपार..

Nashik Politics : कुंभनगरी अर्थात त्र्यंबकेश्वर हा भाजपचा बालेकिल्ला होता. गेल्या निवडणुकीत चौदा नगरसेवकांसह नगराध्यक्षही भाजपचा होता. पण यंदाच्या नगरपालिका निवडणुकीत संकटमोचक गिरीश महाजन यांच्या हातून हा गड निसटला. त्र्यंबकचा निकाल मंत्री महाजनांसाठी धक्कादायक ठरला.

भाजपकडून मंत्री गिरीश महाजन व शिवसेना शिंदे गटाकडून मंत्री दादा भुसे यांनी ही निवडणूक प्रतिष्ठेची केली होती. दादा भुसे यांनी प्रचार काळात त्र्यंबकमध्ये जात आपल्या हाताने रणनिती आखली होती. दुसरीकडे आगामी कुंभमेळा लक्षात घेऊन स्वत:कुंभमेळामंत्री गिरीस महाजन देखील या निवडणुकीवर बारकाईने लक्ष ठेवून होते.

पंरतु दादा भुसे यांनी कुंभमेळा मंत्र्यांना धूळ चारत शिवसेनेचा भगवा त्र्यंबकमध्ये भडकवला. गिरीश महाजन यांचे निकटवर्तीय असलेले कैलास घुले यांचा पराभव झाला. शिवसेनेच्या त्रिवेणी तुंगार त्र्यंबकेश्वरच्या नगराध्यक्ष झाल्या. कुंभनगरीत झालेल्या या पराभवाने महाजन यांना मोठा हादरा बसला.

भाजपला यंदाच्या निवडणुकीत अतिआत्मविश्वास नडल्याचे राजकीय विश्लेषक सांगतात. गेल्या निवडणुकीत १४ नगरसेवक असलेल्या भाजपला केवळ ६ नगरसेवक यंदा निवडून आणता आले. नगराध्यक्षपदाचा उमेदवारही पराभूत झाला.

साहजिकच गिरीश महाजन आणि दादा भुसे या दोघांसाठी ही लढत प्रतिष्ठेची होती. ज्यात दादा भुसे हे महाजनांना वरचढ ठरले. दरम्यान राष्ट्रवादी काँग्रेस अजित पवार गटाचे नगरध्यक्षपदाचे उमेदवार सुरेश गंगापुत्र यांनी अगदी मध्यावर लढतीत सामील न होण्याचा निर्णय घेतला. त्यामुळे राष्ट्रवादीची संपूर्ण ताकद शिवेसेना शिंदे गटाच्या त्रिवेणी तुंगार यांच्या पाठीशी उभी राहिली.

भाजप व शिवसेना शिंदे गट अशी लढत असल्याने भाजप विरोधी पक्षांनी शिंदे गटाला मदत केली. त्यात शिवसेना (ठाकरे गट) व मनसेचे बहुतांश कार्यकर्ते शिंदे गटा सोबत दिसले. साहजिकच भाजप विरुद्ध सर्वपक्ष असे एकंदरीत वातवरण शहरात निर्माण झाले. त्यातून भाजपचा पराभव झाला.