Girish Mahajan: मंत्री झाल्यावर गिरीश महाजनांचे जल्लोषात स्वागत

जामनेर : राज्याच्या मंत्रिमंडळात कॅबिनेट मंत्री (Minister) म्हणून शपथ घेतल्यानंतर पहिल्यांदाच मतदारसंघात आगमन झाल्यानंतर गिरीश महाजनांचे (Girish Mahajan) भारतीय जनता पक्षाचे (BJP) पदाधिकारी, कार्यकर्ते, हितचिंतक आणि असंख्य नागरिकांनी जागोजागी जल्लोषात स्वागत (wel come) केले. शहरात शुक्रवारी सकाळपासूनच हजारो कार्यकर्ते-पदाधिकारी, नागरिकांनी हजेरी लावल्याने अवघा जनसागर उसळल्याचे दिसून येत होते. (Followers & BJP Workers crowd wel come Girish Mahajan)

पहाटे जळगावहून जामनेर मतदारसंघाकडे आगमन होत असताना रस्त्यावरील गाडेगाव, नेरीदिगर-नेरी बुद्रुक, चिंचखेडा, केकतनिंभोरा, पळासखेडा बुद्रुक येथे पदाधिकारी, कार्यकर्ते, ग्रामस्थांनी पुष्पहार-पुष्पगुच्छ देऊन सत्कार केला.

त्यानंतर कृषी उत्पन्न बाजार समितीजवळ कॅबिनेटमंत्री गिरीश महाजन यांचे आगमन होताच ढोल-ताशे, डिजे आदी वाद्यवृंदांच्या व फटाक्यांची प्रचंड आतषबाजी करण्यात आली. घोषणांनी शहर दणाणून गेले होते. या वेळी भाजपचे ज्येष्ठ नेते दिलीप खोडपे, तालुकाध्यक्ष चंद्रकांत बावीस्कर, शिक्षण संस्थेचे सचिव जितू पाटील, अशोक भोईटे, मांगीलाल गिल, बाजार समितीचे सभापती संजय देशमुख, उपसभापती दीपक चव्हाण, उपनगराध्यक्ष प्रा. शरद पाटील, गटनेते डॉ. प्रशांत भोंडे आदी मोठ्या संख्येने होते.

विशालकाय पुष्पहाराने स्वागत

राजमाता जिजाऊ चौकामध्ये कार्यकर्त्यांनी आणलेल्या विशालकाय पुष्पहाराने स्वागत करण्यात आले तसेच जेसीबीने गुलाब फुलांच्या पाकळ्या उधळण्यात आल्या. या वेळी आमदार संजय सावकारे यांचीही उपस्थिती होती. मंत्री महाजन यांचे जावई, अतुल चौधरी आणि अक्षय गुजर यांचीही हजेरी होती.

---