Gulabrao Patil Politics: पालकमंत्री गुलाबराव पाटील संतापले, एकनाथ खडसेंना धारेवर धरले, इतिहासच काढला

Jalgaon News: यंदा आमदारांना त्यांचा निधी मिळालेला नाही. योजनांचे पैसे रखडल्याने कामे खोळंबली आहेत. यावरून आता सत्ताधारी आणि विरोधकांमध्ये वादाची ठिणगी पडली आहे.

स्थानिक स्वराज्य संस्था निवडणुकीच्या पार्श्वभूमीवर भाजप (BJP) आणि शिवसेना एकनाथ शिंदे वाद शिगेला पोहोचला आहे. आमदार किशोर पाटील यांनी गेल्या वर्षभरात माझ्या मतदारसंघासाठी एक रुपयाही मिळाला नाही असा आरोप केला होता. आरोपावरून जळगावच्या राजकारणात चांगलीच खळबळ उडाली आहे.

या वादात राष्ट्रवादी काँग्रेस शरद चंद्र पवार पक्षाचे नेते एकनाथ खडसे यांनीही उडी घेतली. महायुतीतील नेत्यांमधील वादाची संधी त्यांनी साधली. महायुती सरकारच्या कारभारावर त्यांनी ताशेरे ओढले. खडसे म्हणाले, मी गेली 35 वर्ष आमदार आहे. मात्र आजच्यासारखी स्थिती कधीही पाहिली नाही. तीस वर्षात पहिल्यांदाच आमदारांचा हक्काचा निधी देखील रोखण्यात आला आहे.

माजी मंत्री खडसे यांच्या टीकेने जळगावचे पालकमंत्री गुलाबराव पाटील चांगलेच संतापले आहेत. त्यांनी त्यांनी खडसे यांना धारेवर धरले. चुकीची माहिती आणि निधी मिळाल्या नसल्याची दिशाभूल थांबवावी, असे मंत्री पाटील म्हणाले

जळगाव जिल्ह्यासाठी राज्य शासनाने निधी दिला आहे. केळी उत्पादकांसाठी ४०० कोटी रुपयांचा निधी उपलब्ध करून देण्यात आला. अतिवृष्टीग्रस्त शेतकऱ्यांनाही अर्थसहाय्य उपलब्ध करण्यात आले आहे. यंदा अतिवृष्टी झाली. पाऊस जरा जास्तच झाल्याने अडचणी वाढल्या आहेत. मात्र हे मात्र हे निसर्गचक्र आहे. त्याला दिवाळखोरी कसे म्हणता येईल?

माजी मंत्री खडसे हे देखील काही काळ मंत्री होते. त्यांच्या कारकिर्दीत त्यांनी काय केले? कोणती कामे केली? जनतेला कसा दिलासा दिला? हे सांगण्याची आवश्यकता आहे. आपल्या मंत्रीपदात काय कामे केली हे खडसे यांनी सांगावे ही आपली अपेक्षा आहे, असा चिमटा पालकमंत्री पाटील यांनी घेतला.

आगामी स्थानिक स्वराज्य संस्थांच्या निवडणुकीच्या पार्श्वभूमीवर एकनाथ शिंदे शिवसेना आमदार किशोर पाटील यांनी भाजपला आव्हान दिले आहे. त्यामुळे महायुतीत फूट पडली. त्यातूनच शिवसेना शिंदे आणि भाजप यांच्या जोरदार आरोप-प्रत्यारोप सुरू आहेत. हीच संधी माजी मंत्री खडसे यांनी साधली. खडसे यांची टीका पालकमंत्री पाटील यांच्या चांगलीच जिव्हारी लागली असे चित्र आहे.