Gulabrao Patil : जळगावात पालकमंत्रीपदाचा वाद नाही, मी सांगितलं होतं महाजन किंवा सावकारे कोणीही झाले तरी चालतील

Maharashtra Politics Update : आपण निवडून येऊ अशी मलाही गॅरंटी नव्हती, पण लाडक्या बहिणींनी करेक्ट कार्यक्रम केला आणि मी निवडून आलो. मला मंत्रीपद मिळेल की नाही याची देखील खात्री नव्हती, पण तेच खातं पुन्हा मिळालं. जळगावात पालकमंत्रीपदावरुनही वाद नव्हता असं गुलाबराव पाटील यांनी म्हटलं आहे.

किनगाव-जळगाव या मार्गावरील रस्ता काँक्रीटीकरणाच्या कामाचे भूमिपूजन मंत्री गुलाबराव पाटील यांच्या हस्ते झाले. यावेळी त्यांनी जोरदार भाषण केलं. ते म्हणाले, यावेळची मतदानाची टक्केवारी जर बघितली तर महिलांनी आम्हाला खूप मदत केली आहे. सरकार सुद्धा महिलांच्या पाठीशी उभे असून महिलांसाठी अनेक योजना सरकार राबवत असल्याचे त्यांनी सांगितले.

गुलाबराव पाटील पुढे म्हणाले, महाराष्ट्रात पालकमंत्री पदावरून अनेक किरकोळ वाद झाले पण जळगाव जिल्ह्यात वाद झाला नाही. मला विचारलं गेलं गिरीश महाजन पालकमंत्री झाले तर तुम्हाला काय वाटेल, मी सांगितलं चांगलं वाटेल, सावकारे जरी झाले तरी चांगले वाटेल असं मी सांगितलं होतं. त्यांनाही विचारलं तर तेही म्हणायचे गुलाबराव पाटील झाले तरी चालेल. माणसाने सयंमाने व सगळ्या लोकांना घेऊन चाललं, वाद विवाद कमी केला. तर सगळं चांगलं होतं. म्हणून मी सलग दुसऱ्यांदा जळगावचा पालकमंत्री झालो असं मंत्री गुलाबराव पाटील म्हणाले.

गुलाबराव पाटील पुढे म्हणाले, पूर्वी सव्वाचार आमदारांच्या मागे एक मंत्री होता. आता सव्वा सात आमदारांच्या मागे एक मंत्री आहे. एवढी स्पर्धा होती. संख्या वाढली त्यात मी जुना होतो. त्यामुळे मतदान करतात की नाही असं वाटत होतं. पण मंत्री झालो. पुन्हा तेच खात मिळालं.

जळगाव जिल्ह्यात तर अकराच्या अकरा जागा आपल्या निवडून आल्या. विरोधकांना साधी बोहनीसुद्दा करता आली नाही. अकराही आमदार आपले. आपलं नशीब बघा, केंद्रात एक मंत्री आणि राज्यात तीन मंत्री आपले. तीन कॅबिनेट मंत्री एकाच वेळी आपल्या जळगाव जिल्ह्याला मिळाले आहेत असं गुलाबराव म्हणाले. यावेळी मलाही मंत्रिपद मिळेल का नाही याची गॅरंटी नव्हती, कारण वाटा पाडणारे तीन आणि निवडून आलेले 237, पण मी मंत्री झालो असेही गुलाबराव पाटील यांनी यावेळी सांगितले.