Gulabrao Patil News : पवारांना आम्ही घाबरतो, त्यांच्यासारखी बुद्धी कुणाची चालत नाही; पाटलांची मिश्किल टिपण्णी!

जळगाव जिल्ह्यातील चोपडा या तालुक्यात एका लग्न सोहळ्यात यांनी राज्याचे मंत्री गुलाबराव पाटील शाब्दिक टोलेबाजी केली. या लग्नातील वधूचं आडनाव पवार असल्याने, यावर गुलाबराव पाटलांनी राष्ट्रवादी काँग्रेसचे अध्यक्ष शरद पवार आणि विरोधीपक्ष नेते अजित पवार यांच्यावर मजेशीर भाष्य केले आहे. पवारांना आम्ही सुद्धा घाबरून असतो, कारण पवारांची जी बुद्धी चालते, तशी कोणाचीच चालत नाही, असे पाटील म्हणाले.

या लग्न समारंभात बोलताना पाटील म्हणाले, "लग्नातील मुलगी पवार कुटुंबातून येते, त्यामुळे आम्ही घाबरून असतो पवारांना. तुम्ही काळजी करू नका. तुम्ही सकाळी सकाळी शपथ घेऊन टाकता आणि काय करून टाकता, आम्हाला माहिती नाही. त्यामुळे पवारांना आम्ही घाबरून असतो. त्यामुळे पवारांना कायम बरोबर घ्यावं लागतं. कारण पवारांची जी बुद्धी चालते, तशी बुद्धी कोणाचीच चालत नाही."

पवार कुटुंबावर भाष्य केल्याने आता गुलाबराव पाटलांच्या या छोटेखानी भाषणाची चर्चा आहे. गुलाबराव पाटलांच्या या वक्तव्यानंतर आता त्यांचा या व्हिडीओ पाहिला जात आहे. यामुळे पाटील चर्चेत आले आहेत.