मी मरेपर्यंत एकनाथ शिंदे यांचाच राहीन!

नांदगाव : एकनाथ शिंदे (Eknath Shinde) वगळता आपण कोणत्याही नेत्याच्या किंवा पक्ष पदाधिकाऱ्यांच्या संपर्कात नाही. याबाबत गैरसमज पसरवले जात आहेत. मी मरेपर्यंत एकनाथ शिंदे यांचाच समर्थक राहीन. जनतेने आणि सर्व शिवसैनिकांनी (Shivsena) अफवांना बळी पडू नये, असा व्हिडिओ मंगळवारी आमदार सुहास कांदे (Suhas Kande) यांनी समाजमाध्यमांवर प्रसारित केला. (Shivsena`s rebel MLA Suhas kande upload video on social media)

एकनाथ शिंदे यांनी त्यांच्या ट्विटर हँडल व इंस्टाग्राम अकाउंटवरून आमदार सुहास कांदे यांचा व्हिडिओ प्रसारित केला आहे. नंतर नांदगावसह जिल्ह्यातील विविध ग्रुपवर तो व्हायरल झाला.(Eknath Shinde News)

हिंदुहृदयसम्राट शिवसेनाप्रमुख बाळासाहेब ठाकरे यांच्या हिंदुत्वाचा विचार प्रामाणिकपणे पुढे नेणारे एकनाथ शिंदे यांच्यासोबत आपण स्वखुशीने गुवाहाटी येथे आलो आहोत. नांदगाव मतदारसंघातील मनमाडसाठी करंजवण योजना, गिरणा धरणावरील नांदगाव व ७८ गावे यासह विविध विकासकामे मार्गी लागल्या पाहिजेत, यासाठी मी हा निर्णय घेतला आहे, असे स्पष्टीकरण आमदार कांदे यांनी या व्हिडिओतून दिले आहे.

दरम्यान, आमदार कांदे गुवाहाटीत असले, तरी त्यांचे कुटुंब मात्र नाशिक येथील निवासस्थानी आहे.

---