Irshalwadi Landslide: ...तर इर्शाळवाडीची दुर्घटना टाळता आली असती; अमित ठाकरेंनी राज्य सरकारला सुनावलं

Jalgaon : रायगड जिल्ह्यातील इर्शाळवाडीत दरड कोसळून झालेल्या दुर्घटनेत १६ जणांचा मृत्यू झाला. या दुर्घटनेनंतर संपूर्ण महाराष्ट्रात हळहळ व्यक्त होत असतानाच आता महाराष्ट्र नवनिर्माण सेनेच्या विद्यार्थी सेनेचे प्रमुख अमित राज ठाकरे यांनी राज्यातील शिंदे-फडणवीस-पवार सरकारवर जोरदार निशाणा साधला. सरकार आमदार फोडण्यात व्यस्त नसते तर ही दुर्घटना टाळता आली असती, अशी खोचक टिप्पणी अमित ठाकरेंनी केली आहे. ते आज जळगावमध्ये पत्रकार परिषदेत बोलत होते.

इर्शाळवाडीच्या घटनेबाबत राज ठाकरेंनी या आधिच सूचित केले होते. यासंदर्भात सरकारला उपाययोजना करण्यासही त्यांनी सांगितले होते. मात्र, सरकार आमदार फोडण्यात व्यस्त असल्यामुळे त्यांनी याकडे दुर्लक्ष केले. त्यामुळे ही मोठी दुर्घटना घटना घडली व लोकांना आपले जीव गमवावे लागले, असा आरोप करत अमित ठाकरेंनी राज्य सरकारला सुनावलं.

मनसे नेते अमित ठाकरे म्हणाले की, "इर्शाळवाडीची घटना अत्यंत दुर्दैवी आहे. मात्र, या घटनेला काहीअंशी सरकार जबाबदार आहे. राज ठाकरे यांनी या दुर्घटनेबाबत सरकारला अगोदर सूचित केले होते. त्यांनी सरकारला उपाययोजना करण्याबाबत सांगितले होते. पण हे सरकारने त्याकडे दुर्लक्ष केले. जर वेळीच लक्ष देवून उपाययोजना केली असती तर ही घटना घडलीच नसती", असं म्हणत त्यांनी राज्य सरकारलाच या घटनेबाबत जबाबदार ठरवलं आहे.

"राज्यात जी पक्ष फोडाफोडी झाली, त्यामुळे जनतेत तीव्र संताप आहे. पक्षातर्फे राबविण्यात आलेल्या 'एक सही संतापा'ची या उप्रकमात जनतेने मोठ्या उत्स्फूर्तपणे सहभाग घेवून आपल्या संतापाला वाट मोकळी करून दिली", असे सांगत त्यांनी राज्यात झालेल्या पक्ष फोडाफोडीच्या राजकारणावर संताप व्यक्त केला.

विद्यार्थी सेना बळकट करण्यासाठी अमित ठाकरे मैदानात

"महाविद्यालयाच्या बाहेर मनसे विद्यार्थी सेनेचे फलक लावण्यात येतील, तसेच त्यावर प्रमुखांचा मोबाईल क्रमांक असेल. विद्यार्थी अडचणीबाबत त्यांच्याशी संपर्क साधतील, जर प्रमुखाकडून अडचणी सुटल्या नाहीत तर आपण मुंबईहून सोडविणयाचा प्रयत्न करणार आहोत. जर मोठी अडचण असेल तर आपण या ठकाणी जावून सोडविण्याचा प्रयत्न करणार आहोत", असं सांगत खुद्द अमित ठाकरे आता पक्ष वाढीसाठी मैदानात उतरले आहेत.

Edited By- Ganesh Thombare