Ahmednagar Politics : आमदार डॉ. किरण लहामटेंनी सरकारला दिला घरचा आहेर

Ahmednagar News : उपमुख्यमंत्री अजित पवार (Ajit Pawar) यांच्या गटातील आमदार डॉ. किरण लहामटे (Dr. Kiran Lahamte) यांनी शाळा खासगीकरण आणि कंत्राटी भरतीवर रोखठोक भूमिका मांडून सरकारला घरचा आहेर दिला आहे. 'शाळा खासगीकरणाचा निर्णय हा आत्मघाती ठरेल', असे आमदार लहामटे यांनी म्हटले आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

अकोले तालुक्यातील उंचखडक बुद्रुक येथील जिल्हा परिषद प्राथमिक शाळेत रात्र-दिवस वाचनालयाचे उद्घाटन लहामटे यांच्या हस्ते झाले. आमदार लहामटे यांनी शाळा खासगीकरणावर सुरूवातीला सरकारची भूमिका मांडण्याचा प्रयत्न केला. यानंतर हा निर्णय कसा आत्मघाती ठरू शकतो, हे देखील सांगितले.

'सरकारने राज्यातील जिल्हा परिषद शाळांचे खासगीकरण केलेले नाही, तसे ते करणार देखील नाहीत. फक्त शाळांची भौतिक परिस्थिती सुधारावी, यासाठी शाळा कंपन्यांना दत्तक देण्याचे ठरवले आहे. यात शाळा खासगीकरणाचा मुद्दा येत नाहीत, असे सांगत मी स्वतः शाळा खासगीकरण आणि सरकारी नोकर्‍यांच्या कंत्राटीकरणाविरोधात आहे, अशी भूमिका लहामटे यांनी मांडली. हे विषय समजून घेणे महत्त्वाचे आहे. येणार्‍या काळात शाळांचे खासगीकरण करण्याचा प्रयत्न सरकारने (State Government) केल्यास तो निर्णय आत्मघाती ठरेल, असा इशाराही त्यांनी दिला.

लहामटे म्हणाले, 'शाळा दत्तक योजना ही समजून घेतली पाहिजे. एका दृष्टीने हा निर्णय आज चांगला वाटतो. पण उद्याच्या खासगीकरणाची भीती म्हणून हा निर्णय अनेकांच्या मनात साशंकता निर्माण करतो. त्यामुळे सरकारने यावर विचार केलाच पाहिजे'. अकोले तालुक्यातील उंचखडकची शाळा गावातील तरुणांनी उभी केली. बंद पडणारी शाळा 70 विद्यार्थ्यांवर नेवून ठेवली आहे, हे देखील कौतुकास्पद आहे. प्रत्येक वर्गात मॅट, प्रोजेक्टर आणि एलसीडी बसवले आहे, याची दखल घेण्यासारखीच आहे, असेही आमदार लहामटे यांनी म्हटले.

Edited by : Amol Jaybhaye