Mangesh Chavan : पोलीस कर्मचाऱ्यावर तीन लाखांच्या खंडणीचा आरोप, भाजप आमदाराचा पोलिस ठाण्यातच ठिय्या

Jalgaon police news : जळगाव जिल्ह्यातील एका पोलीस कर्मचाऱ्यावर गंभीर आरोप झाला असून, त्याने एका गुन्ह्यातून नाव वगळण्यासाठी तीन लाख रुपयांची मागणी केली होती, असा दावा भाजपाचे आमदार मंगेश चव्हाण यांनी केला आहे. या व्यवहारात नंतर एक लाख रुपये घेतल्याचेही ते म्हणाले. या प्रकरणात संबंधित पोलीस कर्मचाऱ्यावर गुन्हा दाखल करावा आणि तत्काळ अटक करावी, या मागणीसाठी आमदार चव्हाण यांनी थेट पोलीस ठाण्यात ठिय्या मांडला आहे. त्यांनी स्पष्टपणे सांगितले की, "जोपर्यंत गुन्हा दाखल होत नाही, तोपर्यंत आम्ही पोलिस ठाणे सोडणार नाही."

जळगाव जिल्ह्यातील चाळीसगाव शहर पोलिसांवर भाजपचे आमदार मंगेश चव्हाण यांनी गंभीर स्वरूपाचे आरोप करत वातावरण तापवले आहे. एका गुन्ह्यातून नाव वगळण्यासाठी पोलिसांनी एका तरुणाकडून तब्बल तीन लाख रुपयांची मागणी केली, असा ठपका आमदार चव्हाण यांनी ठेवला आहे. यानंतर तडजोड करत एक लाख रुपये स्वीकारल्याचा आरोपही त्यांनी केला.

ही माहिती समोर आल्यानंतर आमदार चव्हाण यांनी संबंधित पोलीस अधिकाऱ्याच्या उपस्थितीत त्या तरुणाशी थेट संवाद साधला. संवादादरम्यान पोलिस अधिकाऱ्याने चौकशी करून योग्य ती कारवाई केली जाईल, असे आश्वासन दिले. मात्र, आमदारांनी स्पष्ट भूमिका घेत "जोपर्यंत आरोपी पोलीस कर्मचाऱ्यावर गुन्हा दाखल होत नाही, तोपर्यंत पोलीस ठाणे सोडणार नाही," असा इशारा दिला.

आमदार मंगेश चव्हाण हे चाळीसगाव शहर पोलीस ठाण्यात तळ ठोकून बसले आहेत. खंडणीखोर पोलिसांवर गुन्हा दाखल करून अटक करा, अशी मागणी त्यांनी लावून धरली आहे. यावेळी पोलीस अधिकाऱ्याशी संवाद साधताना आमदार चव्हाण म्हणाले, आताच्या आता त्या पोलीस कर्मचाऱ्यावर खंडणीचा गुन्हा दाखल करा, त्याला अटक करा. पोलीस ठाण्याजवळ अनेक अवैध व्यवसाय सुरु आहे. त्यासंदर्भात कारवाई का होत नाही? असा सवाल चव्हाण यांनी पोलिसांना केला.

चाळीसगावमधील पंचायत समितीमध्ये शेतकऱ्यांकडून अनुदान मंजुरीसाठी लाच मागितली जात असल्याचा गंभीर आरोप भाजप आमदार मंगेश चव्हाण यांनी केला होता. काही दिवसांपूर्वी त्यांच्या निदर्शनास आले की, विहिरीसारख्या योजनांसाठी शेतकऱ्यांकडून २० ते ३० हजार रुपये मागितले जात आहेत, अशी तक्रार लाभार्थी शेतकऱ्यांनी त्यांच्याकडे केली होती. ही माहिती मिळताच आमदार चव्हाण यांनी थेट पंचायत समितीला भेट दिली. तेथील संबंधित कर्मचाऱ्यांना त्यांनी याबाबत थेट जाब विचारत दोन दिवसांची मुदत दिली. “दोन दिवसांत दोषींवर कारवाई झाली नाही, तर तीव्र आंदोलन छेडू,” असा इशारा दिला होता.