Hindu Jagruti Sabha : वादग्रस्त सुरेश चव्हाणकेंना `ते` भाषण भोवले...गुन्हा दाखल

Jalgaon police news : धार्मिक विद्वेष पसरविण्याचा आरोप असलेल्या व एक वाहिनीची संचालक असलेल्या सुरेश चव्हाणके यांना जळगाव येथील सभेत केलेले भाषण चांगलेच महागात पडले आहे. त्यांच्यासह दोघांवर गुन्हा दाखल दाखल करण्यात आला आहे. हा गुन्हा दाखल झाल्याने हिंदू जनजागृती मंचला चांगलाच झटका बसला आहे. (Jalgaon Police registered a case against controvarsial Chavanke)

जळगाव (Jalgaon) येथे हिंदू (Hindu) जमजागृती मंचतर्फे सभा झाली होती. या सभेची परवानगी देताना पोलिसांनी (Police) आयोजकांना सशर्त परवानगी दिली होती. या सभेत प्रक्षोभक आणि धार्मिक विद्वेष पसरवणारी भाषणे झाल्याची तक्रार आहे. पोलिसांनी त्याबाबत गुन्हा दाखल केला आहे.

जळगाव शहरातील जी. एस. मैदानात हिंदू जनजागृती समितीच्या जाहीर सभेत प्रक्षोभक व आक्षेपार्ह विधाने केल्याप्रकरणी जिल्हापेठ पोलीस ठाण्यात काल रात्री उशीरा गुन्हा दाखल करण्यात आला आहे.

पोलिसांनी दिलेल्या माहितीनुसार, हिंदू जनजागृती समितीच्या वतीने २५ डिसेंबरला सभेचे आयोजन करण्यात आले होते. त्याला मोठ्या संख्येने उपस्थिती होती. या सभेत दिल्लीतील एका वाहिनीचा संचालक सुरेश चव्हाणके (रा. दिल्ली) आणि प्रशांत जुवेकर (रा. जळगाव) अशा दोघांनी आपल्या भाषणातून दोन समाजात तेढ निर्माण होतील, असे आक्षेपार्ह विधाने केली.

त्यात पोलिसांनी सभेसाठी दिलेल्या अटी शर्तीचे उल्लंघन करण्यात आले. चार महिन्यानंतर जिल्हापेठ पोलीस ठाण्याचे पोलीस नाईक भरत चव्हाण यांनी दिलेल्या फिर्यादीवरून प्रशांत जुवेकर आणि सुरेश चव्हाणके या दोघांवर गुन्हा दाखल करण्यात आला आहे. पुढील तपास पोलीस उपनिरीक्षक गणेश देशमुख करीत आहे.

चार महिन्यानंतर...शहाणपण?

ही सभा २५ डिसेंबरला झाली होती. सभेला मोठा पोलिस बंदोबस्त होता. परवानगी देतांना पेालिसांनी अटीशर्ती निर्धारीत केल्या होत्या. काही सुचनाही देण्यात आल्या होत्या. तसेच, गोपनिय विभागाचे कर्मचारी, राज्य गुप्त वार्ता विभागाचे वरिष्ठ अधिकारी, सीआयडीची टिम कार्यक्रमाला हजर होती. त्यांनी आपआपल्या वरिष्ठांना आणि शासनाला त्याच दिवशी भाषणाचे रिपोर्टींग केले होते. असे असतांना चक्क चार महिने उलटल्यावर पोलिसांना ते भाषण आक्षेपार्ह्य वाटून गुन्हा दाखल झाला आहे. त्यामुळे तो चर्चेचा विषय ठरला.