Gulabrao Patil Politics: एकनाथ शिंदेंच्या उपस्थितीतच गुलाबराव पाटील भाजपवर बरसले, म्हणाले, ‘त्यांचा सत्यानाश करा’

Gulabrao Patil News: नगरपालिका निवडणूक शिवसेना एकनाथ शिंदे पक्षाने चांगलीच मनावर घेतली आहे. जळगाव जिल्ह्यात शिवसेना शिंदे भाजपला अडचणीत आणण्याचे सर्व प्रयत्न करीत आहे. त्यामुळे त्यांचा प्रचार चर्चेचा विषय आहे.

पाचोरा भडगाव नगरपालिका निवडणुकीत शिवसेनेचे आमदार किशोर पाटील यांनी स्वबळाचा नारा दिला आहे. त्यांनी भाजपला थेट आव्हान दिले. त्यामुळे भाजपचे जलसंपदा मंत्री गिरीश महाजन यांच्यासह सर्व नेते आमदार पाटील यांच्या विरोधात सक्रिय आहेत.

जळगाव जिल्ह्याच्या राजकारणात पाचोरा नगरपालिका प्रतिष्ठेचा विषय आहे. त्यामुळे आमदार किशोर पाटील यांच्या मदतीला मुख्यमंत्री एकनाथ शिंदे सभेसाठी आले. ही सभा महायुतीचा घटक असलेल्या भाजपवर केलेल्या टीकेने चर्चेत आली.

राज्याचे पाणीपुरवठा मंत्री गुलाबराव पाटील यांनी आमदार पाटील आणि मुख्यमंत्र्यांवर स्तुती सुमने उधळली. मात्र भाजपचा आपल्या खास शैलीत समाचार घेतला. यानिमित्ताने भाजप निवडणुकीत गैरप्रकार करीत असल्याचा आरोप त्यांनी केला.

या सभेत मंत्री गुलाबराव पाटील धो धो बरसले. भाजपचे सर्व नेते आमदार पाटील यांना घेरत आहेत. मात्र आमचा आमदार खमके आहे. सगळ्यांचा हिशोब करून त्यांना घरी बसवेल.

मुख्यमंत्री शिंदे यांच्यामुळेच राज्यात महायुतीचे सरकार आले असा दावा त्यांनी केला. लोकसभा निवडणुकीत विरोधकांचे 31 खासदार निवडून आले. तेव्हा सगळेच घाबरले होते. शिंदे यांनी लाडकी बहीण योजना आणली त्यामुळे महायुतीचे सरकार आले, असा दावा मंत्री पाटील यांनी केला.

भाजपवर ते तुटून पडले. म्हणाले, आता समोरच्यांकडून गैरप्रकार सुरू झाले आहेत. पार्ट्या सुरू झाल्या. तुम्ही पार्ट्यांना जा, त्यांचे मटन खा, पण बटन मात्र शिवसेनेचेच दाबा आणि समोरच्यांचा सत्यानाश करा.

लक्ष्मी दर्शन होणार आहे, असे मी म्हणालो, त्यावर माझ्यावर टीका केली जाते. मात्र आम्ही टपरीवाले आणि रोडवरचे लोक आहोत. लक्ष्मी म्हणजे फक्त नोटा असतात का? लक्ष्मी म्हणजे महिला, आई-बहीण ही देखील असू शकते, असा खुलासा करण्याचा प्रयत्न त्यांनी केला.

-------