Jalgaon Politics : बैठकीतच नेते एकमेकांवर धावले ! शरद पवार गटात जळगावात तुफान गोंधळ

Maharashtra politics : राष्ट्रवादी कॉंग्रेस शरदचंद्र पवार पक्षाची गुरुवारी जळगावच्या जिल्हा कार्यालयात बैठक झाली. या बैठकीत पक्षाच्या पदाधिकारी व समर्थकांमध्ये चांगलीच हमरी-तुमरी झाल्याचे पाहायला मिळाले. यावेळी दोने नेते एकमेकांवर धावून गेल्याने मोठा राडा झाला. वाद अजून विकोपाला जाऊ नये म्हणून पक्षनिरीक्षक भास्कर काळे यांनी मध्यस्थी करत हा वाद मिटविला.

पक्षाच्या आकाशवाणी चौकातील कार्यालयात ही बैठक पार पडली. मंडल यात्रेचे नियोजन आणि आगामी स्थानिक स्वराज्य संस्थांच्या निवडणुकांबाबत दिशा ठरविण्यासाठी निरीक्षक भास्कर काळे यांच्या अध्यक्षतेखाली ही बैठक आयोजित करण्यात आली होती.

यावेळी माजी खासदार ईश्वरलाल जैन, जिल्हाध्यक्ष प्रमोद पाटील, माजी जिल्हाध्यक्ष अॅड. रवींद्र पाटील, माजी आमदार संतोष चौधरी, डॉ. बी.एस. पाटील, महानगराध्यक्ष एजाज मलीक, महिला अध्यक्षा वंदना चौधरी, शहराध्यक्षा मंगला पाटील, विकास पवार, युवती प्रमुख कल्पिता पाटील, प्रतिभा शिरसाठ, डि.के. पाटील, डॉ. चंद्रकांत बारेला, संग्रामसिंह सुर्यवंशी, रिकू चौधरी, सोपान पाटील आदी पदाधिकारी उपस्थित होते.

पदावरुन दोघांमध्ये झाला वाद

आदिवासी सेलचे माजी जिल्हाध्यक्ष इब्राहीम तडवी आणि प्रदेश कार्याध्यक्ष डॉ. चंद्रकांत बारेला यांच्यात आदिवासी सेलच्या जिल्हाध्यक्ष पदाच्या नियुक्तीवरून वाद झाला. जे काम करतात त्यांच्याकडून पद काढून घेतले जाते आणि जे कामाचे नाहीत अशा लोकांना पदे दिली जातात असा आरोप तडवी यांनी केला. तसेच तडवी यांनी बारेलांवर निवडणुकीत पैसे घेतल्याचा आरोप केला. यावेळी बारेला समर्थकांनी तडवींच्या आरोपांवर आक्षेप घेतला.

तेव्हा दोन्हीकडील पदाधिकाऱ्यांमध्ये शाब्दिक चकमक होऊन गोंधळ निर्माण झाला. हा गोंधळ वाढताच पक्षाचे निरीक्षक भास्कर काळे यांनी दोन्हीकडील पदाधिकाऱ्यांना शांत करीत वाद मिटविण्याचा प्रयत्न केला. यासंदर्भात विचारणा केली असता वाद अगदी किरकोळ स्वरुपाचा होता असे अध्यक्ष प्रमोद पाटील यांनी सांगितले.

जैन यांचा देवकर पाटील यांच्यावर निशाणा

ही बैठक केवळ दोन नेत्यांमध्ये झालेल्या वादामुळे गाजली नाही तर, बैठकीत पक्षाच्या नेत्यांनी स्वपक्षीयांना हाणलेल्या टोमण्यांनी व टीकेमुळे देखील ही बैठक गाजली. माजी खासदार ईश्वरलाल जैन यांनी माजी मंत्री गुलाबराव देवकर, डॉ. सतीश पाटील यांच्यावर निशाणा साधला. ज्यांच्यावर साहेबांचा विश्वास होता, त्यांनी साहेबांना धोका दिला. काही जणांनी स्वार्थासाठी पक्ष सोडला अशी टीका जैन यांनी केली.

मंडल यात्रेचे नियोजन

राष्ट्रवादी कॉंग्रेस शरदचंद्र पवार पक्षातर्फे शरद पवार यांच्या नेतृत्वात राज्यभर मंडल यात्रा निघाली आहे. ही यात्रा 1 सप्टेंबर रोजी जळगाव जिल्ह्यात येणार आहे. यावेळी प्रदेशाध्यक्ष शशिकांत शिंदे, आमदार रोहित पवार येण्याची शक्यता आहे. त्यासंबंधी या बैठकीत नियोजन करण्यात आले. आगामी जिल्हापरिषद व इतर स्थानिक संस्थांच्या निवडणुकीसाठी कार्यकर्त्यांनी आतापासून तयारी करावी. तसेच मतदारयाद्यांमध्ये घोळ घालण्याचा सत्ताधाऱ्यांकडून होणारा प्रयत्न पाहता, त्यावर लक्ष ठेवावे अशा सूचना करण्यात आल्या.