Jarange Patil : दोघांचाही बाजार उठवेन... धनंजय मुंडेंवर टीका करताना जरांगेंचा अजित पवारांनाही इशारा

Maharashtra politics : बीड येथील भगवान भक्तीगडावर आयोजित दसरा मेळाव्यात मंत्री पंकजा मुंडे व आमदार धनंजय मुंडे दोघांनीही मनोज जरांगे पाटील यांना लक्ष्य केलं. आमच्या लेकरांच्या ताटातले घेऊ नका असे आवाहन पंकजा मुंडेंनी केलं. तर मराठा समाजाला आरक्षण मिळाल्याचा आनंद आहे, पण काही लोक खूर्चीसाठी आरक्षणाच्या आड ओबीसीतून गैरफायदा घेण्याचा प्रयत्न करत असल्याचं माजी मंत्री धनंजय मुंडेंनी म्हटलं.

त्यानंतर आता मराठा आंदोलक मनोज जरांगे पाटील यांनी पंकजा मुंडे आणि धनंजय मुंडे यांच्यावर जोरदार हल्लाबोल करत प्रत्युत्तर दिलं आहे. रक्ताने हात भरलेल्यांनी माझ्या नादी लागू नये असा हल्लाबोल मनोज जरांगे पाटील यांनी माजी मंत्री धनंजय मुंडे यांच्यावर केला. धनंजय मुंडे प्रचार करतील ती सीट पाडणार असा इशाराही त्यांनी दिला. धनंजय मुंडेंच्या आडून यावेळी जरांगे पाटील यांनी राष्ट्रवादीचे प्रमुख व उपमुख्यमंत्री अजित पवार यांच्यावरही निशाणा साधला.

माझ्यावर बोलायचं नाही असं जरागेंनी धनंजय मुडेंना सुनावलं आहे. तू जर इथून पुढे माझ्या नादी लागला तर मी सांगतो मी दोघांचाही बाजार उठवेन. क्लीअर सांगतो. तुझ्यामुळे मी अजित पवारांचा सुद्धा कार्यक्रम लावेन असा इशारा जरांगे पाटील यांनी दिला. धनंजय मुंडे ज्याच्या प्रचाराला येईल ते सीट मी पाडणार मग तो उमेदवार मराठ्यांचा असला तरी पाडणार असा इशारा जरांगेंनी दिला.

जरांगे पाटील म्हणाले, तुम्ही मला काय बोलता की ओबीसीतून खातो असं. आम्हाला ओबीसींचं खायचं तर तू कशाला बंजारा समाजाचे खातो? कशाला बंजारा समाजातून आरक्षण घेतलं? कशाला लोकांच्या काड्या करतात. तू माझ्या नादी लागू नको. शहाणपणा करायचा नाही. तू तिकडे नीट राहायचं. रक्ताने हात माखलेल्यांनी माझ्या जातीवर बोलायचे नाही या भाषेत जरांगेंनी धनंजय मुंडेंना प्रत्युत्तर दिलं.

शहाणा असेल तर माझ्या नादी लागू नको, तुमच्या दोघांच्या हातून वेळ गेलेली नाही. छगन भुजबळचे ऐकून माझ्या आणि माझ्या जातीच्या नादी लागू नका. दोघांच्या राजकीय करिअरचा देव्हारा करु, तुम्हाला वाचावायला कुणी येणार नाही. माझ्या लादी लागाल तर राजकारणातून नामोनिशान संपवू, असा इशाराच जरांगेंनी अजित पवार व धनंजय मुंडे दोघांना दिला.